Airí an chomhrialtais nua ainmnithe ag an Taoiseach, príomhchúram na Gaeltachta ar Dhara Calleary

Tá airí an chomhrialtais nua ainmnithe sa Dáil ag an Taoiseach nua Micheál Martin.

Ar Dhara Calleary (FF), a bheidh príomhchúram na Gaeltachta agus é ina Aire Coimirce Sóisialaí agus ina Aire Forbartha Tuaithe agus Pobail agus Gaeltachta.

Cainteoir Gaeilge é Calleary, Teachta Dála do Mhaigh Eo, a chaith tamall gearr ina aire stáit Gaeltachta.

Níorbh léir láithreach an mbeadh Calleary freagrach as cúram laethúil na Gaeltachta, nó an leanfar leis an nós an cúram sin a tharmligean le haire stáit, mar atá déanta ag gach rialtas ó 2011.

Beidh ceannaire Fhine Gael Simon Harris ina Thánaiste agus ina aire gnóthaí eachtracha agus cosanta sa Dáil nua. Paschal Donohoe, Fine Gael, a bheidh ina aire airgeadais agus leascheannaire Fhianna Fáil, Jack Chambers, a bheidh ina aire caiteachais phoiblí.  

 Jennifer Carroll MacNeill (FG) a bheidh ina haire sláinte agus Jim O’Callaghan (FF) a bheidh ina aire dlí agus cirt. Helen McEntee (FG) a bheidh ina haire oideachais agus óige. 

 Is é Darragh O’Brien (FF) an t-aire iompair, aeráide agus fuinnimh nua agus tá an post a bhí aige mar aire tithíochta faighte ag James Browne (FF)

Peter Burke (FG) a bheidh mar aire fiontraíochta, turasóireachta agus fostaíochta, an t-aon duine a choimeád an post a bhí aige sa rialtas deireanach.  

Norma Foley a bheidh ina haire leanaí agus daoine faoi mhíchumas agus Patrick O’Donovan (FG) a bheidh ina aire cumarsáide, ealaíon agus meán.

Martin Heydon (FG) a bheidh ina aire talmhaíochta sa chomhrialtas nua. James Lawlor (FF) atá ainmnithe mar aire sa Roinn Breisoideachais. Mary Butler (FF) a bheidh ina príomhaoire agus beidh sí freagrach chomh maith as cúrsaí meabhairshláinte.