Is é Ailbhe Ó Monacháin a bheidh ina thuairisceoir san iarthuaisceart ag Nuacht RTÉ/TG4.
Bhí Ó Monacháin ar dhuine de na chéad láithreoirí ar TnaG nuair a tosaíodh an stáisiún sa bhliain 1996 agus thosaigh sé ag obair le Nuacht RTÉ/TG4 sa bhliain 1998.
Líonfaidh sé an folús a d’fhág Áine Ní Bhreisleáin nuair a d’fhág sí Nuacht RTÉ/TG4 le dul ag obair le RTÉ Raidió na Gaeltachta níos túisce i mbliana.
Lonnaithe in oifig RTÉ RnaG sna Doirí Beaga i nGaeltacht Thír Chonaill a bheidh Ó Monacháin agus é ag tuairisciú ar scéalta ar fud an iarthuaiscirt.
Tá obair iriseoireachta, láithreoireachta agus eagarthóireachta déanta ag Ó Monacháin ó thosaigh sé ag obair leis an Nuacht 17 bliain ó shin. Anuas ar an obair sin, bhí lámh aige i gcláracha faisnéise ar TG4 agus ba é a d’aistrigh an tsraith ‘Séideán Staire’ ar TG4 agus a thug glór do scéalaí na sraithe.
Tógadh Ó Monacháin i nGaoth Dobhair agus tá céim sna Nua-Theangacha aige ó Ollscoil na hÉireann, Gaillimh.
Fág freagra ar 'Ailbhe Ó Monacháin ceaptha ina thuairisceoir san iarthuaisceart ag Nuacht RTÉ/TG4'