Na Leoin réidh le tabhairt faoin Astráil faoi dheireadh ach bí cinnte go mbeidh cleas nó dhó réitithe ag Joe Schmidt

Chaill na Leoin i gcoinne na hAirgintíne (28-24) i gcluiche dúshláin i mBaile Átha Cliath mí ó shin, sular imigh siad leo ó dheas chun na hAstráile.

Níorbh aon chúis náire an chailliúint sin, a mhalairt go deimhin. Léirigh an choimhlint neart deacrachtaí agus laigí i ngnéithe éagsúla d’imirt agus de chur chuige na Leon. Deacrachtaí beaga “arbh éasca iad a cheartú” a d’fhógair Andy Farrell sa bpreas-agallamh i ndiaidh an chluiche. Idir sin agus seo tá cúig chluiche ullmhúcháin eile imeartha ag na Leoin i gcoinne foirne ó na réigiún éagsúla san Astráil agus i gcoinne foireann ar a raibh meascán imreoirí ón Astráil agus ón Nua-Shéalainn. Níl na deacrachtaí beaga sin ar fad ceartaithe ná sáraithe go fóill!

In ainneoin aithne mhaith a bheith ag na himreoirí ar a chéile agus ar phlean imeartha Farrell faoin tráth seo, is minic go mbíonn imirt na Leon scaoilte agus gan struchtúr. Ní hamháin sin ach is minic deacrachtaí cumarsáide eatarthu, sa síneadh amach go háirithe.

Is cinnte go mbeidh Farrell ag súil gur éirigh leis na laigí sin ar fad a chur ó dhoras sna seisiún traenála ó d’imir siad an cluiche réitithe seachtain ó shin. Beidh le feiceáil.

Ní ar stíl imeartha na Leon amháin a bheas aird an domhain agus iad ag imirt an chéad cheann de na trí mhórchluiche i gcoinne na hAstráile, cluiche a thosóidh ag a 11:00 ar maidin dúinne anseo in Éirinn. Beidh neart spéise freisin sa rogha triúr fichead imreoirí atá roghnaithe aige do chéad mhórchluiche sin, agus sa gcúigear déag a thosóidh.

Má bhíonn an bua ag na Leoin beidh chuile rud ceart agus beidh chuile dhuine ciúin agus socair. Ach má chailleann siad, déanfar neart gleo maidir le rogha Farrell. Is cinnte freisin go leagfar béim ar an aon imreoir déag ón tír seo atá ar an bhfoireann, ochtar ag tosú agus triúr ar an mbinse nó b’fhéidir go gceapfar nach raibh dóthain díobh ann!

Dála an scéal sin é an líon is mó imreoirí ón tír seo a roghnaíodh ariamh d’aon mhórchluiche Leon. Cheap mé go mbeadh Josh Van Der Flier ina measc, ach tá dhá mhórchluiche eile aige chun á áit a bhaint amach.

Sin iad na cúraimí atá ar ghuaillí Farrell. Fuair chuile imreoir a thug sé ó dheas deis a gcuid buanna agus a gcumas a léiriú sna réamhchluichí. Inniu, tabharfaidh an triúr fichead imreoirí is fearr as Sasana, an Bhreatain Bheag, Albain agus an tír seo dúshlán na hAstráile i Brisbane.

In ainneoin buntáiste an bhaile a bheith ag na Wallabies inniu, is iad na Leoin rogha na coitiantachta. Tá an Astráil ag cothú foireann as an nua faoi láthair agus iad faoi stiúir Joe Schmidt, iar-chóitseálaí rugbaí na tíre seo. Is cinnte go mbeidh cleas nó dhó ag Schmidt a chruthós deacrachtaí do na cuairteoirí. Mar sin féin tá mise sásta bua do na Leoin a thuar, in ainneoin imní a bheith orm faoi chúpla rogha atá déanta ag Farrell.

D’ainneoin na himní, is fiú a rá nár lig an fear síos fós mé. Seasfaidh mé leis arís inniu.