Sparánacht €30,000 le bronnadh ar ealaíontóir Gaeltachta in ómós don ghrúpa ceoil Clannad

Tá deontas €30,000 le bronnadh ag Údarás na Gaeltachta ar ealaíontóir Gaeltachta in ómós don ghrúpa ceoil Clannad agus don obair atá déanta acu chun an Ghaeilge a chur chun cinn. 

Tá ócáid speisialta á reáchtáil ag Údarás na Gaeltachta i nGaoth Dobhair tráthnóna chun aitheantas a thabhairt do Clannad, atá ag éirí as an tseinm tar éis breis is leathchéad bliain. 

Tá sé fógartha ag an Údarás go bhfuil sparánacht nua d’ealaíontóir Gaeltachta le bronnadh in onóir an bhanna de bharr an bhéim a chuir Clannad ar theanga, ar chultúr agus ar dhúchas na Gaeltachta ó thosaigh siad ag seinm. 

Sparánacht ar fiú €30,000 é, €10,000 sa bhliain thar thrí bliana, atá i gceist, chun cuidiú le healaíontóir Gaeltachta forbairt a dhéanamh ar shaothar úr trí mheán na Gaeilge. Ealaín na Gaeltachta a bheidh i mbun na scéime thar ceann an Údaráis. 

Bhunaigh Pádraig agus Noel Ó Dúgáin agus Pól, Ciarán agus Máire Uí Bhraonáin an banna ceoil Clannad i 1970, tá clú agus cáil bainte amach acu ar fud an domhain agus gradaim go leor bronnta orthu, dámhachtain Grammy, BAFTA, agus Ivor Novello ina measc. 

Bhásaigh Noel Ó Dúgáin go tobann anuraidh agus fuair a dheartháir Pádraig bás in 2016. 

Dúirt Príomhfheidhmeannach Údarás na Gaeltachta, Tomás Ó Síocháin gur thug Clannad “an ceol, na hamhráin agus an Ghaeilge chuig ardáin dhomhanda agus is iomaí duine ar fud na cruinne a spreag siad agus a d’fhoghlaim Gaeilge de bharr tiomantas an ghrúpa don teanga agus don chultúr trí chéile. Ní hamháin sin, ach spreag siad mórtas i bpobal na Gaeltachta ina dteanga agus a n-oidhreacht féin. Is údar bróid dúinn ar fad iad.  

“Tá lúcháir orainn go bhfuil an deis againn an bród agus an buíochas sin a léiriú inniu, agus tacaíocht a thabhairt d’ealaíontóir Gaeltachta eile tríd an sparánacht atá á fógairt againn.” 

Tháinig Clannad le chéile ar dtús sna seachtóidí nuair a bhíodh siad ag seinm i dTábhairne Leo, an teach tábhairne cáiliúil a bhí ag athair mhuintir Uí Bhraonáin, Leo Ó Braonáin, i nGaoth Dobhair agus is sa tábhairne céanna a bheidh an ócáid in ómós do Clannad á reáchtáil inniu.