Sé White Lines (Netflix) an tsraith is déanaí ón scríbhneoir a thug Money Heist dúinn, an tsraith Spáinneach úd a bhfuil dúil thar na bearta ag lucht féachana ar fud na cruinne ar an gceithre shéasúr di atá déanta go dtí seo. Is saothar Béarla/Spáinnise í atá lonnaithe den chuid is mó ar oileán cáiliúil Ibiza.
I gcaitheamh na sraithe déanfar cíoradh ar an mistéir agus an t-uisce faoi thalamh a bhaineann le dúnmharú dioscmharcaigh breis agus fiche bliain ó shin.
Ag tús an chéad chláir tagtar ar chorp Axel Collins in Almería na Spáinne, fear a d’imigh gan tásc ná tuairisc ó oileán Ibiza breis agus fiche bliain ó shin. Nuair a thugann na póilíní le fios dá dheirfiúr Zoe (Laura Haddock) go bhfuil reacht na dtréimhsí caite, tugann sí faoin oileán le scéal a dhúnmharaithe a fhiosrú í féin.
Tá deacrachtaí meabhairshláinte ag an mbean chéanna ó bhí sí óg agus mheas sí gur thréig a deartháir í le héalú ón saol crua a bhí acu in Manchain.
In Ibiza buaileann sí le gach aon sórt leábharaic agus cúblálaí: cairde lena deartháir, lucht rachmais, lucht díolta drugaí, dioscmharcaigh agus lucht freastail fleánna craois is craicinn. Scéinséir le smut den ghreann agus radharcanna breátha den fharraige; is mór idir sin agus an dianghlasáil.
Tháinig The Last Dance chun críche an tseachtain seo. Sraith í seo a thugann éachtaint ar shaol is gaiscí cispheile Michael Jordan, a bhliain dheireanach leis na Chicago Bulls, ach go háirithe.
Tá cad é bús faoin tsraith le seachtainí agus n’fheadar an é an easpa spóirt, an maoithneachas nó an léargas ar an laoch spóirt seo atá sa Táin is cúis leis an dúil sin. Bailítear meitheal bhreá de chloigne cainte le paistí cainte a dhéanamh, an laoch é féin i lár an aonaigh ach ionchur ó ghaolta, cairde, comhghleacaithe agus céilithe comhraic; agus mise á rá leat go raibh cleatráil mhaith den dream deireanach díobh sin ann.
Do dhream amháin againn tugann an saothar seo siar bóithrín na smaointe sinn; do dhream eile, seo cuntas ar fhoireann a mheasann mórán a bheith ar an bhfoireann chispheile is fearr riamh.
Labhraíonn Jordan é féin go macánta pointeáilte neamhleithscéalach. Léiríonn sé é féin mar fhear uaillmhianach stobarnáilte a bhí gafa go hiomlán leis an iomaíocht agus leis an mbua. Fear nárbh leasc leis beagán a dhéanamh de dhuine a tháinig sa tslí air. Fear a d’fhéadfadh a bheith mustrach tíoránach.
Déantar cur síos ar a óige agus a aistear chun cáile agus é ar foluain os cionn chláir na gcúirteanna cispheile.
Na trí bhua as a chéile i dtosach na nóchaidí agus arís i ndeireadh na nóchaidí. An chomhghuaillíocht le Scottie Pippen agus Dennis Rodman, airgead Nike, ‘Dream Team’ na cispheile ag na cluichí Oilimpeacha i 1992 agus an naimhdeas le leithéidí Isiah Thomas agus Jerry Krause.
Sé Jerry Krause, nach maireann, bithiúnach na sraithe, léamh ná rabhas chomh compordach sin leis óir dhein sé a chion féin lena chinntiú go mbeadh rath ar fhoirne na dTarbh. Cinnte d’fhéadfadh an fear seo, a raibh rian den choimpléasc Napoleon ag cur as dó, a bheith mórchúiseach ceanndána ach deineadh smut d’éagóir air, dar liom. Ba léir go raibh an-smacht ag Jordan ar chomhdhéanamh an chláir.
Sraith shlachtmhar thaitneamhach a thugann éachtaint ar dhuine, ar fhoireann agus ar thréimhse faoi leith i stair na cispheile.
Fág freagra ar 'Michael Jordan mórchúiseach ag foluain os cionn chláir na gcúirteanna cispheile agus scéinséir eile ó údar ‘Money Heist’'