Leithscéal gafa as bileoga Béarla a scaipfear sa Ghaeltacht sa chéad olltoghchán eile

Tá gealltanais tugtha agus leithscéalta gafa i leith na Gaeilge ag polaiteoirí

Leithscéal gafa as bileoga Béarla a scaipfear sa Ghaeltacht sa chéad olltoghchán eile

Tá leithscéal gafa ag na páirtithe polaitíochta as ábhar bolscaireachta i mBéarla amháin a scaipfear ar mhuintir na Gaeltachta sa chéad olltoghchán eile.

Dúirt na páirtithe go léir gur chúis mhór aiféala dóibh go scaipfear bileoga Béarla san olltoghchán, a mheastar a bheidh ar siúl ag deireadh na bliana seo nó an bhliain seo chugainn.

Gheall na páirtithe go léir nach dtarlódh a leithéid arís in olltoghchán 2025.

Idir an dá linn, tá geallta ag iarrthóirí fud fad na tíre atá ag seasamh i dtoghcháin na seachtaine seo, gur Gaeilge amháin a labhróidh siad feasta má thoghtar Dé hAoine iad,  bíodh is nach bhfuil aon fhocal Gaeilge ina bpluc ag cuid acu.

Gheall na hiarrthóirí an méid sin agus a thuilleadh go sollúnta i suirbhé a chuir Conradh na Gaeilge faoina mbráid.

Chuir na páirtithe agus na hiarrthóirí go léir tic le fonn san uile bhosca a cuireadh faoina bpus sa suirbhé agus dúradh gur fianaise eolaíoch an-dearfach go deo é sin ar rath na teanga agus ar an bhfeachtas stocaireachta is déanaí ag Conradh na Gaeilge.

Dúirt urlabhraí de chuid Chonradh na Gaeilge gur léirigh an feachtas, a bhfuil comhfhocal nua éigin agus haischlib roimhe mar theideal air, gur údar dóchais é toradh an tsuirbhé.

“Táimid an-sásta leis an bhfeachtas seo mar beidh tionchar dearfach aige ar normalú agus feiceálacht na teanga a éascú,” arsa urlabhraí thar ceann Chonradh na Gaeilge.

Fág freagra ar 'Leithscéal gafa as bileoga Béarla a scaipfear sa Ghaeltacht sa chéad olltoghchán eile'