Laghdú i dtacaíocht Fhine Gael sa chéad phobalbhreith den fheachtas toghcháin

Tá drochscéal do pháirtithe an chomhrialtais agus dea-scéal d’Fhianna Fáil sa chéad phobalbhreith d’fheachtas olltoghcháin 2016.

Léiríonn torthaí na pobalbhreithe is déanaí ón Irish Times/Ipsos MRBI go bhfuil an leibhéal tacaíochta atá ag Fine Gael tite dhá phointe go 28% agus go bhfuil Páirtí an Lucht Oibre fós ar 7%. Thit leibhéal na tacaíochta atá ag Sinn Féin ó 21% go dtí 19%.

I bhfianaise na pobalbhreithe seo, ní bheadh dóthain tacaíochta ag Fine Gael agus Páirtí an Lucht Oibre rialtas a bhunú an athuair tar éis an toghcháin.

Tháinig ardú 2% ar leibhéal tacaíochta Fhianna Fáil agus ardú 2% a bhí i gceist chomh maith i gcás na neamhspleách agus iarrthóirí eile.

Reáchtáladh an phobalbhreith Dé Luain agus Dé Máirt na seachtaine seo i measc 1,200 vótóir.

Dheimhnigh an Taoiseach Enda Kenny ar a chuntas Twitter inné gur ar an 26 Feabhra a rachaidh an pobal ag vótáil sa 40 dáilcheantar sa stát.

Ina dhiaidh sin, chuaigh an Taoiseach chuig Áras an Uachtaráin mar ar iarr sé ar Uachtarán na hÉireann Michael D Higgins an 31ú Dáil a lánscor.

158 suíochán a bheidh ann sa 32ú Dáil, agus móramh de 79 suíochán a theastóidh chun rialtas a bhunú.