Fiafraigh de ChatGPT faoi líon na marbh in Gaza is braithfidh an freagra ar theanga do cheiste

Cuir ceist ar bhot AI cé mhéid duine a maraíodh sa chogadh in Gaza agus braithfidh an freagra ar an teanga a labhraíonn tú leis.

Léiríodh i staidéar nua ar shamhailtí móra teanga (LLM), dála ChatGPT, go mbíonn tionchar ag an teanga a úsáidtear leis an LLM ar na torthaí a chuirtear ar fáil.

Rinne lucht taighde in Ollscoil Zürich san Eilvéis agus Ollscoil Konstanz sa Ghearmáin staidéar ar na freagraí a chuir ChatGPT ar fáil ar cheisteanna a bhain le dhá choimhlint idirnáisiúnta – an choimhlint in Gaza agus an choimhlint idir na Turcaigh agus na Coirdínigh.

Cuireadh ceisteanna faoi líon na ndaoine a bhásaigh sna coimhlintí i dteangacha difriúla. Fiafraíodh faoi líon na marbh sa choimhlint idir an Phalaistín agus Iosrael san Eabhrais agus san Araibis agus fiafraíodh faoi líon na marbh sa choimhlint eile sa Tuircis agus sa Choirdis.

Léiríodh sa staidéar go raibh difríocht 34 ± 11% idir na teangacha sna meastacháin a chum an LLM. Is i dteanga an ionsaitheora a bhí an meastachán ab ísle. Frítheadh freisin gur minice a chuirtear freagra “seachantach” ar fáil i dteanga an ionsaitheora mar a séantar gur tharla nó go dtarlaíonn a leithéid d’ionsaithe.

Chuir na taighdeoirí na ceisteanna ceannann céanna san Araibis agus san Eabhrais faoi ionsaithe ar leith – ionsaí Iosrael ar an gcampa teifeach i Nuseirat in 2014, mar shampla.

Luadh sibhialtaigh a dhá oiread níos minice agus páistí a shé oiread níos minice sna freagraí Araibise a chum Chat GPT ná mar a luadh iad sna freagraí Eabhraise.

Ba é an córas GPT 3.5 a úsáideadh don staidéar ach rinneadh “anailís shimplithe” ar thorthaí GPT-4 – an leagan is nua de Chat GPT – agus ba iad “na treochtaí céanna” a bhí i gceist ansin.

Agus na difríochtaí sna freagraí tugtha faoi deara ag na taighdeoirí, thug siad faoi údar na neamhréire sin a thuiscint. Rinneadh “anailís chórasach” ar na foinsí nuachta Araibise agus ba léir nach ndearna an LLM ceangal idir ionsaithe sonracha agus líon na marbh mar a tuairiscíodh iad ar an nuacht san Araibis.

“Mar gheall go mbíonn sé ag brath ar fhocail a thagann aníos arís agus arís eile, d’fhéadfadh an LLM líon na marbh ó ionsaithe difriúla a d’fhág lorg níos mó ar chúrsaí nuachta a lua le hionsaithe eile, nó líon carnach na marbh atá go mór chun cinn sna sonraí oiliúna,” a míníodh sa staidéar.

Dúirt údair an staidéir, Christoph Valentin Steiner agus Daniel Kazenwadel, go bhfuil an fhéidearthacht ann go méadódh an claonadh teanga a aithníodh ina gcuid taighde na claontaí eile atá ann agus faisnéis á scaipeadh amach anseo agus go gcuirfí le “bolgáin eolais”, agus go gceapfá gur mar sin atá an saol.