Tabharfaidh Pearse Doherty an chraobh leis gan stró dá laghad san Olltoghchán i nDún na nGall, de réir torthaí pobalbhreithe a rinneadh do TG4 sa dáilcheantar sin.
De réir na pobalbhreithe a rinne Ipsos MRBI do TG4, thiocfadh an tAire Oideachais Joe McHugh slán sa dara háit agus bheadh dhá shuíochán ag Sinn Féin i nDún na Gall.
De réir na dtorthaí, bheadh ar a laghad suíochán amháin ag Fianna Fáil agus bheadh sé ina chogadh dearg don suíochán deireanach idir duine de bheirt iarrthóirí an pháirtí sin agus an t-iarrthóir neamhspléach Thomas Pringle.
27% de vótaí céad rogha, nó cuóta go leith, a bheadh ag Doherty, urlabhraí airgeadais Shinn Féin, agus é go rábach chun cinn ar chách.
| 2020 | OT 2016 | |
|---|---|---|
| Pearse Doherty – Sinn Féin | 27% | 14% |
| Joe McHugh – Fine Gael | 17% | 11% |
| Charlie McConalogue – Fianna Fáil | 12% | 17% |
| Pádraig Mac Lochlainn – Sinn Féin | 12% | 8% |
| Pat ‘The Cope’ Gallagher – Fianna Fáil | 10% | 14% |
| Thomas Pringle – Neamhspleách | 6% | 8% |
| John O’Donnell – Neamhspleách | 4% | |
| Michael White – An Comhaontas Glas | 4% | |
| Mary T Sweeney – Aontú | 3% | |
| Martin Harley – Fine Gael | 3% | |
| Peter Casey – Neamhspleách | 2% | |
| Niall McConnell – Neamhspleách | 1% |
Bheadh Joe McHugh sa dara háit d’Fhine Gael agus 17%, de vótaí céad rogha aige, rud a thabharfadh an cuóta dó.
Má thagann an tuar faoin tairngreacht, bheadh an suíochán a chaill Pádraig Mac Lochlainn do Shinn Féin aige arís a bhuíochas d’fharasbarr Pearse Doherty.
| Vóta Céad Rogha i nDún na nGall | |
|---|---|
| Sinn Féin | 38% |
| Fine Gael | 20% |
| Fianna Fáil | 22% |
| Neamhspleách* | 19% |
| (*Comhaontas Glas agus Aontú san áireamh) | |
De réir na pobalbhreithe, bheadh seans ag Fianna Fáil an dá shuíochán atá acu a choimeád ach vótaí aistrithe a shocróidh cá rachaidh an cúigiú suíochán.
31% de na vótaí céad rogha a bhí ag Fianna Fáil in olltoghchán 2016 ach 22% a bheadh ag beirt iarrthóirí an pháirtí sa chéad chomhaireamh an babhta seo más fíor don phobalbhreith. 12% atá ag Charlie McConalogue agus 10% atá ag Pat ‘the Cope’ Gallagher.
Díol suntais eile sa phobalbhreith ná a laghad tacaíocht a léiríodh do Peter Casey, an neamhspleách a tháinig sa dara háit i dtoghchán uachtaránachta na bliana seo caite. 2% a bhí ag Casey agus níl aon rian go fóill den Rabharta Glas i nDún nGall agus gan ach 4% ag iarrthóir Chomhaontas Glas, Michael White.
Rinneadh pobalbhreith TG4 Ipsos MRBI Dé Luain agus Dé Máirt na seachtaine seo agus ceistíodh 550 duine. Is é móide nó lúide 4% an lamháil earráide.
Ba iad na Teachtaí Dála a toghadh i nDún na nGall in 2016 ná Charlie McConalogue (FF) agus Pat ‘the Cope’ Gallagher (FF), Joe McHugh (FG), Pearse Doherty (SF) agus Thomas Pringle (NS).
Fág freagra ar 'Doherty agus McHugh slán agus gan ach 2% ag Peter Casey – pobalbhreith TG4'