Ceithre mhí príosúnachta gearrtha ar fhear as Conamara a rinne bagairtí ar líne ar Simon Harris

Tá pianbhreith ceithre mhí gearrtha ar fhear as Conamara a rinne bagairtí ar líne ar Simon Harris, a bhí ina Thaoiseach ag an am. Dúirt Patrick Grealish, atá 49 bliain d’aois agus ina chónaí i nGarraí an Choirce i Leitir Mealláin, go maródh sé Harris agus a chlann i mbagairtí a rinne sé ar líne.

Cúisíodh Grealish i mí na Nollag seo caite ach cuireadh gearradh na pianbhreithe siar go dtí an mhí seo. Gabhadh i mí Lúnasa na bliana seo caite é tar éis bagairtí a dhéanamh ar na meáin shóisialta go maródh sé Harris nó go ndéanfadh sé dochar tromchúiseach dó.

Rugadh ar Grealish agus an gléas ónar seoladh na bagairtí ina sheilbh. Dúirt lucht dlí an chosantóra go raibh sé ina chúramóir ag a mháthair agus go bhfuil a fhadhbanna sláinte féin aige.

Phléadáil Grealish ciontach agus ghearr an Breitheamh Fiona Lydon ocht mí príosúnachta air i gcúirt Dhoire an Fhéich inniu. Cuireadh na ceithre mhí dheireanacha ar fionraí.

Dúirt Simon Harris, atá anois ina Thánaiste, i ráiteas a léadh sa chúirt gurbh fhearr leis gan an cás a bheith os comhair na cúirte ach go raibh sé ‘tábhachtach” go dtuigfeadh Grealish an tionchar a bhí ag an méid a rinne sé ar Harris agus ar a mhuintir.

“Tá a fhios agam go bhfuil cuid mhór den domhan ar líne sa lá atá inniu ann ach tá mé ag iarraidh go mbeidh a fhios agat nuair a théann tú i bhfolach taobh thiar de do mhéarchlár agus d’ainm úsáideora nach léiríonn cé thú féin, bíonn tionchar ceart fós ag do chuid focal agus is údar gortaithe, péine, agus imní do chuid bagairtí,” a dúirt an Tánaiste.

Dúirt sé go raibh sé ina theach cónaithe ag a deich a chlog san oíche nuair a fuair sé teachtaireacht ar na meáin shóisialta ina ndúirt Grealish gur theastaigh uaidh a bhean chéile agus a chlann a ghortú agus inar cuireadh síos go grinn ar an méid a dhéanfadh sé orthu.

“Samhlaigh [gur tharla sé sin] sa chomhthéacs go raibh bagairtí leanúnacha á bhfáil ag an teaghlach ó fhoinsí eile roimh an teachtaireacht sin. Cén chaoi a n-aireofá féin, dá léifeá go raibh duine éigin ag iarraidh do pháistí óga a ghortú, go raibh duine éigin ag iarraidh do dhaoine muinteartha a ghortú? Ar chuimhnigh tú ar an tionchar nuair a scríobh tú an teachtaireacht agus nuair a sheol tú í?” a dúradh i ráiteas Harris.

Dúirt an Tánaiste gur airigh sé go raibh a theaghlach i bhfíorchontúirt nuair a chonaic sé an bhagairt ó Grealish agus go raibh an foréigean in aghaidh polaiteoirí níos coitianta sa lá atá inniu ann.

“Níl aithne agam ort, níl rud ar bith ar eolas agam fút, ní ghuífinn drochrud ort choíche. Faraor, níor thug tú an meas bunúsach céanna do mo theaghlach. Chreid mé go fírinneach gur chuir do ghníomhartha i mbaol muid trí bhagairt dhíreach a bhí tú ag iarraidh a fhíorú nó trí bhagairt a phostáil agus súil agat daoine eile a spreagadh,” a dúirt Harris.

Ciontaíodh Grealish 70 uair cheana as goid agus as coireanna ar an mbóthar. Dúradh sa tuairisc phromhaidh a réitíodh don chás go raibh fadhbanna mothúchán ag Grealish nuair a rinne sé na bagairtí agus go raibh sé ag ól an lá sin. Dúradh freisin gur bhásaigh beirt chairde leis thart ar an am céanna freisin.