Beidh na Leoin ag iarraidh a chruthú nárbh aon bhotún a rinne na hAstrálaigh ba chúis lena mbua

Ba dheacair deireadh a bheadh fiú leath chomh drámatúil agus a bhí deireadh an dara mórchluiche idir na Leoin agus na hAstrálaigh Dé Sathairn seo caite, a shamhlú.

Gan ach leath nóiméad fágtha ar an gclog agus foireann an bhaile chun cinn le dhá phointe, thrasnaigh Hugo Keenan na hÉireann líne an úid mar chríoch ar ghluaiseacht agus ar shárionsaí ó na Leoin. Theip ar Finn Russell an t-úd a shlánú ach ba leor an bhearna trí phointe a chruthaigh Keenan le bua sa dara mórchluiche a chinntiú do na Leoin agus bua sa tsraith freisin.

Is fiú a lua nach raibh na Leoin chun cinn sa gcluiche go dtí an nóiméad deiridh sin, a bhuíochas do shárimirt na nAstrálach agus do theaicticí Joe Schmidt, gnéithe a chinntigh cluiche a bhí iomaíoch agus fisiciúil ón gcéad nóiméad.

Is trua ar bhealach nár éirigh leis na Wallabies síorionsaí na Leon a sheasamh ar feadh leathnóiméad amháin eile mar go gcinnteoidh sin go mbeadh cluiche ollmhór againn inniu i Sydney sa triú mórchluiche agus cluiche deiridh an turais.

Mar sin féin, fiú gan na cúiseanna na an spreagadh mealltach sin,  is cinnte go mbeidh an dá fhoireann ar a míle dícheall ar thóir bua. Beidh na hAstrálaigh ag iarraidh a chruthú dá lucht leanúna go bhfuil áit agus aitheantas mar cheann de mhórfhoirne rugbaí an domhain tuillte acu arís.

Ar an taobh eile beidh na Leoin ag iarraidh a chruthú nárbh aon bhotún a rinne na hAstrálaigh ba chúis lena mbua féin sa dara mórchluiche. Anuas air sin, beidh Farrell ag iarraidh an turas ó dheas a chríochnú agus bua faighte aige i chuile chluiche san Astráil.

Níl aon dabht ach go mbeadh sé sin go deas ach is cuma. Tá an tsraith faoina ascaill ag Farrell agus leathlámh aige freisin, silim, ar chúram an príomhchóitseálaí don chéad thuras Leon eile a bheas ag dul chun na Nua-Shéalainne in 2029.

Seans freisin go mbeidh neart imreoirí ón tír seo a d’imir Dé Sathairn seo caite agus arís inniu ag cur a láimhe in airde don turas sin. Beidh Hugo Keenan, Andrew Porter, Dan Sheehan, James Lowe, James Ryan agus Rónán Kelleher, imreoir a bhí thar barr ar fad, ina measc.  Thug an bheirt Thadhg, Byrne agus Furlong chomh maith le Jamison Gibson Park, Jack Conan, Bundee Aki sárthaispeántas uathu freisin ach seans go bhfuil an aois ina gcoinne. Is cinnte freisin go mbeidh leithéidí Joe McCarthy, Mack Hansen agus neart imreoirí eile ón tír seo sa tóir ar an ngeansaí dearg sin.

Mar sin féin, tá go leor rugbaí le n-imirt idir seo agus sin, Craobh an Domhain agus cluiche an lae inniu san áireamh. Maidir leis in gcluiche is ábhar ceiliúrtha dúinn arís go bhfuil an oiread imreoirí ón tír seo ag dul chun páirce, naonúr ag tosnú agus imreoir amháin ar an mbinse. Freisin Tadhg Furlong ag imirt ina naoú mórchluiche do na Leoin le cúl a céile. Ó thus na ré gairmiúla sa rugbaí níl an churriarracht sin bainte amach ach ag imreoir amháin eile, Alun Wyn Jones ón Breatain Beag.