Tá molta ag an Ollamh Cúnta le hIriseoireacht in Ollscoil Luimnigh, Ger Colleran, go ndéanfaí Gaelscoil de gach bunscoil sa tír. Ina cholún ar an Irish Daily Star, dúirt iar-eagarthóir an nuachtáin sin gur cheart Éire a athshamhlú mar thír dhátheangach trí scoil lánGhaeilge a dhéanamh de gach bunscoil.
Dúirt Colleran gur theip ar an gcóras oideachais chomh fada is a bhain sé le teagasc na Gaeilge le céad bliain anuas.
Scríobh sé ar a cholún gur “teip ghlan agus cur amú airgid” a bhí i dteagasc na Gaeilge go dtí seo agus gur chothaigh an bealach inar mhúintí í olc agus ”gráin” i measc an phobail don teanga.
Dúirt Colleran áfach gur “léir don dall” réiteach na faidhbe — Gaelscoil a dhéanamh de gach bunscoil. Mhaígh sé go bhfuil gluaiseacht na Gaelscolaíochta ar cheann de ghnéithe an chórais oideachais is mó rath.
“Caithfimid a rá linn féin ‘an gcuirfidh muid suas leis an oidhreacht uafásach, dhorcha seo a fágadh againn maidir le múineadh na teanga, nó an athróimid é? Tá múnla iontach againn ann, agus ní bheadh aon fhadhb ann é a chur i bhfeidhm dá mbeadh toil an phobail agus toil na n-údarás ann chuige sin,” a dúirt sé le Newstalk ar maidin.
Dúirt iar-eagarthóir an Irish Daily Star go mba ghá an plean a mhíniú don dhaoine chun go mbeadh tacaíocht an phobail aige ach mhaígh sé go raibh an teanga “ag teastáil” ón bpobal agus go raibh “dea-thoil” ann di.
Chaithfí a chur ar a súile do dhaoine gur “chun leas na sochaí” a bheadh sé dá mba scoil lán-Ghaeilge gach bunscoil sa tír, a dúirt sé. Chaithfí a mhíniú dóibh chomh maith gurb ionann an dátheangachas agus “bronntanas mór millteach”.
