Ar mhaithe le ‘seasamh’ le pobal na teanga sa bhaile a labhair buaiteoir an Turner Prize Gaeilge

Dúirt Stephen Millar, duine den Array Collective as Béal Feirste a bhuaigh an duais mhór ealaíne i mbliana, gur cheap sé go raibh sé an-tábhachtach go mbeadh an Ghaeilge le cloisteáil ar BBC News agus an scéal á fhógairt

Ar mhaithe le ‘seasamh’ le pobal na teanga sa bhaile a labhair buaiteoir an Turner Prize Gaeilge

Ar mhaithe le “seasamh le pobal na Gaeilge sa bhaile” a labhair duine de bhuaiteoirí an Turner Prize i nGaeilge ag searmanas bronnta i Sasana an tseachtain seo.

Dúirt Stephen Millar, duine den Array Collective as Béal Feirste a bhuaigh an duais mhór ealaíne i mbliana, gur cheap sé go raibh sé an-tábhachtach go mbeadh an Ghaeilge le cloisteáil ar BBC News agus an scéal á fhógairt.

Bhí Millar ar dhuine den 11 ealaíontóir a bhuaigh an duais Turner dá suiteán inar dheineadar teach tábhairne Éireannach de spás gailearaí.

‘The Druithaib’s Ball’ an teideal a bhí ar shaothar an Array Collective a chruthaigh “síbín” chun aird a tharraingt ar chéad bhliain de chríochdheighilt na hÉireann.

Dúirt moltóirí an Tate, an músaem a bhronnann an Turner, go raibh siad “an-tógtha” leis an tslí ar éirigh leis an ngrúpa ealaíne Feirsteach a gcuid “gníomhaíochais agus luachanna” a chur i láthair i ngailearaí chun taispeántas a chruthú a bhainfeadh siar as duine.

Tá an duais Turner ainmnithe i ndiaidh

J.M.W. Turner agus é buaite cheana ag ealaíontóirí mór le rá amhail Damien Hirst, Tracey Emin, Grayson Perry agus Anish Kapoor.

Seo an chéad uair gur éirigh le saothar ón Tuaisceart an gradam a bhuachan ó bunaíodh é i 1984.

Léigh tuilleadh sa rannóg seo 'Cultúr'

Fág freagra ar 'Ar mhaithe le ‘seasamh’ le pobal na teanga sa bhaile a labhair buaiteoir an Turner Prize Gaeilge'

    I mBéal an Phobail