Tá os cionn 1,100 duine marbh sa choimhlint is déanaí idir Hamas agus Iosrael ar cuireadh tús léi Dé Sathairn nuair a thrasnaigh míleataigh as Gaza an teorainn chun ionsaí gan choinne a dhéanamh ar Iosraelaigh.
Maraíodh na céadta Iosraelach in ionsaí Hamas, ionsaí a spreag ionsaithe ón aer ar Gaza.
Thug lucht tarrthála le fios gur thángthas ar 250 corp ag láthair fhéile cheoil in Iosrael a ndearna Hamas ionsaí uirthi Dé Sathairn.
Tuairiscíodh aréir go raibh ar a laghad 700 Iosraelach agus os cionn 410 Palaistíneach marbh sa choimhlint is géire idir an dá thaobh le fada an lá. Os cionn 2,000 duine a bhí gortaithe in Iosrael agus dúradh go raibh os cionn 2,000 gortaithe chomh maith i stráice Gaza.
D’fhógair Príomh-Aire Iosrael Benjamin Netanyahu inné go raibh sé ina chogadh agus dúirt sé gur “cogadh crua agus fada” a bheadh ann. Bhí fórsaí Iosrael ag dul ar an ionsaí, a dúirt sé, agus leanfadh an t-ionsaí sin ar aghaidh “gan srian ná sos” nó go mbainfí a aidhmeanna amach.
D’fhógair Stáit Aontaithe Mheiriceá a thuilleadh tacaíochta míleata d’Iosrael agus chuir siad le líon na saighdiúirí atá acu sa cheantar.
Fág freagra ar 'Os cionn 1,100 duine marbh sa choimhlint idir Hamas agus Iosrael'