D’fhógair Roinn Sláinte an Tuaiscirt tráthnóna go raibh ochtar eile a bhí buailte ag Covid-19 básaithe agus deimhníodh go rabhthas tagtha ar 39 cás nua den ghalar.
2,122 duine ar a laghad atá básaithe in Éirinn ó thús na ráige, 1,608 duine ó dheas den teorainn agus 514 ó thuaidh di.
29,248 cás den ghalar Covid-19 atá deimhnithe go dtí seo in Éirinn, 24,639 cás ó dheas den teorainn agus 4,609 cás ó thuaidh.
Fógraíodh na figiúirí is déanaí tráth a ndúirt an Rialtas ó dheas go bhfuiltear ag cloí leis an gcomhairle fanacht dhá mhéadar amach ó dhaoine eile.
Dúirt Liz Canavan, Rúnaí Cúnta na Roinne Sláinte gur sábháladh “beatha na mílte duine” de bharr na dtreoirlínte maidir leis an scoitheadh sóisialta agus go gcaithfí aon athrú a dhéanfaí orthu a dhéanamh go mall agus de réir a chéile.
Bhí sí ag déanamh a cuid cainte agus go leor plé ar siúl cé acu méadar nó dhá mhéadar ba chóir do dhaoine fanacht óna chéile.
Dúirt Canavan gur dhá mhéadar atá á chomhairliú ag an Rialtas i gcónaí agus é sin ina chuid den phlean atá ann na srianta a scaoileadh de réir a chéile.
“D’fhéadfadh borradh a theacht faoi ionfhabhtuithe má bhogaimid rófhada róghasta. Ní mór dúinn a fhios a bheith againn conas atá ag éirí linn ó chéim go céim.
“Sin é an fáth go bhfuil trí seachtaine fágtha idir gach céim, ionas go mbeimid in ann measúnú a dhéanamh ar an tionchar a bheidh ag an víreas ar na bearta éagsúla.”
Tá an Eagraíocht Dhomhanda Sláinte (WHO) ag moladh do dhaoine fanacht ar a laghad méadar amháin óna chéile agus dhá mhéadar más féidir in aon chor é chun srian a chur le scaipeadh an víris.
Molann An Lárionad Eorpach um Ghalair a Chosc agus a Rialú (ECDPC) do dhaoine fanacht méadar nó níos faide ná sin ó dhaoine.
Dúirt Dr David Nabarro, toscaire speisialta an WHO ar Covid-19, go mbeidh duine “slán ón víreas 99% den am” ach fanacht dhá mhéadar amach ó dhaoine eile.
Dúirt sé freisin “go laghdóidh duine an chontúirt go mór ach fanacht méadar amháin ó dhaoine eile”.
Dúirt an Dr Nabarro ar an gclár Today ar RTÉ go dtaistealóidh 70% de na braoiníní ó chasacht duine méadar amháin ón duine sin ach gur “fíorbheagán de na braoiníní a shéidfear níos faide ná dhá mhéadar”.
Tá 521 othar in ospidéil géarchúraim agus an coróinvíreas orthu nó amhras ann gurb é atá orthu. Tá tástáil dhearfach faighte ag 303 de na hothair sin.
49 othar atá in Aonaid Dianchúraim agus diagnóis Covid-19 faighte acu agus tá 20 othar eile sna haonaid sin agus amhras ann gurb é an galar a d’fhág ann iad.
Tá 126 leaba cúram criticiúil ar fáil faoi láthair ach tá an líon leapacha cúram ginearálta atá ar fáil inniu laghdaithe ó 2200 go 735.
Idir an dá linn, dúirt rúnaí Gnóthaí Eachtracha na Síne go raibh an chuma air go raibh “víreas polaitiúil” tolgtha ag Washington ach mar sin féin go bhfáilteodh an tSín roimh iarracht idirnáisiúnta teacht ar fhoinse an choróinvíris.
“Tá an caidreamh idir an tSín agus na Stáit Aontaithe ina ghiall ag roinnt fórsaí polaitiúla sna Stáit Aontaithe agus iad ag brú an dá thír i dtreo Cogadh Fuar nua,” a dúirt Wang Yi.
Fág freagra ar 'Ocht mbás eile fógartha sa Tuaisceart, 2,122 duine le Covid-19 básaithe in Éirinn'