Eolas á lorg ag na póilíní faoi eachtra inar briseadh fuinneoga Gaelscoile

Tá eolas á lorg ag na póilíní ar An Srath Bán faoi eachtra inar briseadh fuinneoga Gaelscoile ar an mbaile sin ag an deireadh seachtaine.

Rinneadh an loitiméireacht ag suíomh na scoile nua atá á tógáil ansin ar chostas £7.2 milliún, Gaelscoil Uí Dhochartaigh.

Bhí tógáil na gaelscoile beagnach críochnaithe nuair a briseadh trí cinn de na fuinneoga nua a bhí curtha isteach ag an deireadh seachtaine, agus ón taobh istigh den fhoirgneamh a briseadh iad.

Tá sé deimhnithe ag na póilíní gur briseadh roinnt fuinneoga úra am éigin idir tráthnóna Dé hAoine, 15 Meán Fómhair agus maidin Dé Luain, an 18 Meán Fómhair.

Tá imní léirithe ag údaráis na scoile go bhféadfadh an damáiste coiriúil seo moill a chur ar an obair thógála

“Tá díomá an domhain orainn. Goilleann sé seo go mór ar phobal na scoile. Níl agam ach impí orthu siúd a raibh baint acu leis gan aon damáiste a dhéanamh dár scoil nua agus gan moill a chur le críochnú ár scoile. Bhíomar tamall fada ag fanacht go foighdeach leis an scoil nua seo,” a dúradh i ráiteas na soile.

Cháin Maolíosa McHugh, Comhalta den Tionól Reachtach le Sinn Féin an loitiméireacht.

“Chuir an scéal gur briseadh isteach ag an deireadh seachtaine san fhoirgneamh nua don Ghaelscoil ar An Srath Bán agus gur briseadh trí fhuinneog úra a bhí díreach curtha isteach déistin orm.

“Cé go bhfuil an chosúlacht air gur loitiméireacht gan chiall a bhí anseo agus nach raibh sí pleanáilte roimh ré, is deacair meon an té a loiteann agus a mhilleann foirgneamh ar mhaithe le spraoi a thuiscint.

“Cibé duine a rinne é seo, níl aon tuiscint aige ar an streachailt agus an obair chrua a bhí le déanamh ag an Ghaelscoil chun an foirgneamh úr seo a fháil ná go bhƒéadfadh loitiméireacht dá leithéid na hiarrachtaí a chur ar gcúl.

“Má tá aon eolas ag aon duine faoi na daoine a rinne an loitiméireacht seo, ba chóir dóibh é sin a chur ar fáil. Níl de rogha ag an chonraitheoir anois ach athbhreithniú a dhéanamh ar chúrsaí slándála ag an suíomh,” a dúirt feisire Thír Eoghain Thiar.

Ar Bhóthar Strahans atá an scoil nua á tógáil do Ghaelscoil Uí Dhochartaigh.

Bheadh na póilíní buíoch dá ngabhfadh aon duine a chonaic aon údar amhrais nó aon rud neamhghnách i dteagmháil leo.

“Tuigimid go bhfuil tamall fada i gceist ach aon duine a raibh ceamara acu sa charr nó a fhaigheann aon rud suntasach, bheimis buíoch ach sinn a chur ar an eolas.

“Má tá aon eolas a chuideodh leis na póilíní, téigh i dteagmháil le do thoil le 101 nó tuairiscigh ar líne agus úsáid an uimhir thagartha 202 an 18 Meán Fómhair 2023,” a dúirt an PSNI.