‘Ceannairc oscailte’ i gCiarraí agus comhairleoirí áitiúla ag cur i gcoinne cheannasaíocht Fhine Gael

Tá ‘ceannairc oscailte’ ar bun ag comhairleoirí de chuid Fhine Gael i gCiarraí i gcoinne cheannasaíocht an pháirtí mar thoradh ar an gcliseadh a bhain don pháirtí sin sa gcontae in Olltoghchán 2024.

Tá Fine Gael fágtha gan Teachta Dála i gCiarraí den chéad uair ó 1948 agus teipthe ar iarrthóir an pháirtí, Billy O’Shea, suíochán a bhaint.

Bhain conspóid leis an gcinneadh O’Shea, a chaith ocht mbliana ag imirt peile do Chiarraí idir 1992 agus 1999, a roghnú mar iarrthóir agus roinnt mhaith ball d’Fhine Gael sa Ríocht den tuairim go gcaithfí iarrthóir eile a chur chun cinn in éindí le O’Shea, a bhí ag seasamh i dtoghchán den chéad uair.

Tá triúr den seisear comhairleoirí áitiúla atá ag Fine Gael i gCiarraí – Bobby O’Connell ó Oileán Ciarraí, Mike Foley ó Bhéal Átha Longfoirt agus Tommy Griffin ón Seanchaol – tar éis teacht amach anois agus cáineadh láidir a dhéanamh ar straitéis toghcháin an pháirtí.

Agus é ag labhairt le RTÉ Raidió na Gaeltachta, dúirt Tommy Griffin nach bhfuil aon locht aige ar Billy O’Shea go pearsanta agus go raibh botún déanta ag ceannáras an pháirtí iarrthóir ‘mór le rá’ a ainmniú ach gur cheart go mbeadh ionadaí poiblí le taithí roghnaithe.

Dúirt Griffin go raibh sé riachtanach d’Fhine Gael beirt iarrthóirí a chur chun cinn i gCiarraí toisc chomh fairsing agus chomh héagsúil is atá an contae.

Bhí leathbhádóirí ag an gcúigear iarrthóirí a toghadh i gCiarraí san olltoghchán, an bheirt Healy-Rae, Michael agus Danny; Pa Daly Shinn Féin agus beirt ó Fhianna Fáil, Norma Foley agus Michael Cahill; a thug leo na cúig shuíochán Dála sa Ríocht.

Dúirt Griffin ar RnaG go raibh sé “croíbhriste” nach mbeadh suíochán Dála ag Fine Gael i gCiarraí den chéad uair le 76 bliain agus go mbeadh an suíochán buaite acu “gan stró” dá mbeadh ceannasaíocht an pháirtí tar éis éisteacht leis na comhairleoirí áitiúla.

Bhí Griffin féin ar dhuine de na comhairleoirí a bhí sásta seasamh d’Fhine Gael san olltoghchán. Dúirt sé gur thacaigh sé le Billy O’Shea agus gur mhol sé do dhaoine vóta a chaitheamh dó ach nach ndeachaigh sé féin amach ag stocaireacht dó ar bhonn prionsabail.

Col ceathrair é Tommy Griffin le Brendan Griffin, a bhí ina Theachta Dála d’Fhine Gael i gCiarraí idir 2011 agus 2024, ach a chinn i mbliana seasamh siar ón bpolaitíocht.

Tuairiscítear go bhfuil ceannaireacht Fhine Gael chun seasamh le Billy O’Shea agus go bhféadfaí é a chur chun cinn do thoghchán an Seanaid agus don chéad olltoghchán eile.

Mar fhreagra air sin, dúirt Tommy Griffin gur cheart d’Fhine Gael díriú ar an 6,500 vóta a cailleadh idir olltoghcháin 2020 agus 2024 agus gur cheart do cheannaireacht an pháirtí teacht anuas go Ciarraí agus an díobháil atá déanta don pháirtí a dheisiú.

Agus é ag labhairt le Radio Kerry, dúirt Michael Finucane, an t-iarTheachta Dála ó Luimneach a bhí ina stiúrthóir toghcháin ag Fine Gael i gCiarraí, nach n-éireodh leis an straitéis beirt iarrthóirí a chur chun cinn agus go raibh an triúr comhairleoirí a bhí tar éis labhairt amach i gcoinne an chinnidh gan a chur chun cinn ach iarrthóir amháin, Billy O’Shea, tar éis Fine Gael “a ligean síos”.

Dúirt an Feisire Eorpach Seán Kelly ar TG4 ag an deireadh seachtaine nach ionadh a bhí ann nach raibh na comhairleoirí áitiúla sásta agus go raibh an iomarca béime á cur ar iarrthóirí mór le rá.