Brat na Palaistíne le crochadh ag Teach Laighean agus aitheantas stáit le teacht i bhfeidhm

D’fhógair an Taoiseach Simon Harris an tseachtain seo caite go bhfuil Éire leis an bPalaistín a aithint mar stát agus inniu a thabharfar feidhm don fhógra

Brat na Palaistíne le crochadh ag Teach Laighean agus aitheantas stáit le teacht i bhfeidhm

Beidh brat na Palaistíne ar foluain os cionn Theach Laighean inniu nuair a thabharfaidh Éire aitheantas go hoifigiúil don Phalaistín mar stát.

Dúirt ionadaí na Palaistíne, Dr Jilan Wahba Abdalmajid, go raibh sí ag súil go mór le bratach a stáit a fheiceáil ar foluain ag Tithe an Oireachtais.

“Lá dár saol é,” a dúirt sí.

D’fhógair an Taoiseach Simon Harris an tseachtain seo caite go bhfuil Éire leis an bPalaistín a aithint mar stát agus inniu a thabharfar feidhm don fhógra. Cloisfear i nDáil Éireann tráthnóna ráitis faoin scéala go mbeidh aitheantas ag an bPalaistín feasta mar stát.

Rinne Éire, an Spáinn agus an Iorua fógra faoi aitheantas a thabhairt don Phalaistín mar stát an tseachtain seo caite tar éis míonna fada comhairliúcháin ar fud na hEorpa agus sa Mheánoirthear.

Dúirt ionadaí na Palaistíne gur “léas dóchais” do mhuintir na Palaistíne a bhí san fhógra ag tráth a bhfuil go mór ar anchaoi.

Údar bróid di a bheith ina hionadaí in Éirinn do phobal na Palaistíne, a dúirt Jilan Wahba Abdalmajid,

Bhí scáil ar an áthas sin, áfach, a dúirt sí leis an Examiner tráth a bhfuil na mílte á marú in Gaza.

Faoin aitheantas stáit atá anois ag an bPalaistín beidh ambasáid feasta acu in Éirinn seachas misean mar atá faoi láthair. Ceapfar chomh maith ambasadóir ón bPalaistín chun na hÉireann agus beidh ambasáid seachas oifig ionadaí ag Éirinn in Ramallah.

Ní mó ná sásta atá Iosrael le cinneadh na hÉireann aitheantas a thabhairt do stát na Palaistíne.

Chuir Iosrael fios ar ambasadóirí na dtrí thír a rinne an fógra le féachaint ar fhíseán d’ionsaithe Hamas ar Iosrael an 7 Deireadh Fómhair 2023. Bhí na meáin i láthair ag an ócáid, rud a cháin an tAire Gnóthaí Eachtracha Micheál Martin go láidir.

Dúirt Israel Katz, Aire Gnóthaí Eachtracha Iosrael, an tseachtain seo caite go gcuimhneofaí sna cuntais staire gur shocraigh Éire, an Spáinn agus an Iorua “réalt óir a thabhairt do dhúnmharfóirí agus éigneoirí Hamas”.

Aithníonn 142 tír as an 193 atá ina mbaill de na Náisiúin Aontaithe stát na Palaistíne ach seachas an tSualainn, is beag de thíortha iarthar na hEorpa, an Ríocht Aontaithe ná na Stáit Aontaithe atá ina measc.

Fág freagra ar 'Brat na Palaistíne le crochadh ag Teach Laighean agus aitheantas stáit le teacht i bhfeidhm'