Bonn óir buaite ag na rothaithe Katie-George Dunlevy agus Linda Kelly sna Cluichí Parailimpeacha

Tá a gcéad bhonn óir buaite ag foireann na hÉireann ag na Cluichí Parailimpeacha 2024 tráthnóna agus na rothaithe Katie-George Dunlevy agus Linda Kelly tagtha sa gcéad áit i dTriail Ama Aonair B na mban i bPáras.

Is é seo an tríú huair ag Dunlevy bonn óir a bhuachan sa gcomórtas agus í sa gcéad áit in Rio de Janeiro agus i dTóiceo nuair a bhí Eve McCrystal mar phíolóta aici.

Bhuaigh Dunlevy agus McCrystal bonn airgid i rás tóraíochta 3,000m B na mban sa velodrome Dé Sathairn seo caite agus seacht gcinn de bhoinn ar fad atá buaite ag Dunlevy ag na Cluichí Parailimpeacha, sé cinn aici-se agus ceann i dteannta McCrystal.

Chríochnaigh Dunlevy agus Kelly an cúrsa i 38:16.58 tráthnóna agus iad chun tosaigh ar Sophie Unwin agus Jenny Hall ón mBreatain. Beirt eile ó fhoireann na Breataine, Lora Fachie agus Corrine Hall a tháinig sa tríú háit.

Is sa chúigiú háit, in am 41:57.61, a chríochnaigh an bheirt eile ó fhoireann na hÉireann a bhí ag rás tráthnóna, Josephine Healion agus Eve McCrystal.

Is é bonn Dunlevy agus Kelly an tríú ceann atá buaite ag Éirinn i bPáras le 24 uair an chloig anuas agus an cúigiú ceann san iomlán.

Bhuaigh an snámhaí Róisín Ní Riain a dara bonn ag na Cluichí Parailimpeacha seo nuair a chríochnaigh sí sa tríú háit sa mheascra aonair 200m sa rannóg SM13 aréir. Bhuaigh Ní Riain, iardhalta Ghaelcholáiste Luimnigh, bonn airgid sa snámh droma 100m S13 Dé hAoine seo caite.

Beidh Ní Riain san iomaíocht san La Defense Arena arís Déardaoin agus í sa snámh brollaigh 100m SB13.

Aréir bhuaigh Orla Comerford bonn cré-umha sa rás ráibe 100m T13 sa Stade de France. Chríochnaigh bean Bhaile Átha Cliath i 11.94, í chun deiridh ar Lamiya Valieya na hAsarbaiseáine a thug léi an bonn óir le curiarracht dhomhanda nua – 11.76 – agus Rayan Soares da Silva ón Brasaíl a tháinig sa dara háit (11.78).