An clutharú cultúrtha le Michael Jordan, Eoghan Mac Giolla Bhríde agus Josh Ritter

Ó druideadh an giom, ní bhíonn deis agam iarann a phumpáil le mo phosse níos mó agus is i muinín an rothair a bhím leis an chiall a choinneáil ionam agus an meáchan a chaitheamh díom.

A bhuíochas sin den aimsir dheas, is iomaí sin éan spéisiúil a bhíonn le feiceáil. Tá mórán clamhán faoin loch faoi láthair agus is ábhar iontais agam é a bheith ag amharc orthu agus iad ag léim ar an aer te anuas le heitilt go barr na spéire. Chonaic mé spioróg lá amháin agus í sa tóir ar ghealbhain sna páirceanna máguaird agus tá na fáinleoga ar ais cois locha. Níl mórán acu ann go fóill ach is dea-chomhartha i gcónaí iad; ní fada uainn an samhradh, slán beo a bheas muid.

Ó tharla fosta go bhfuil deireadh le cúrsaí spóirt, bím i muinín Netflix le cláracha faisnéise spóirt a aimsiú. Tá ceann ar dóigh go díreach i ndiaidh tosú, The Last Dance, sraith faoin chispheileadóir iontach, Michael Jordan, agus a bhliain deiridh i mbun na gciseán. Níl ach dhá chlár craolta go dtí seo ach is maith an léargas a thugann siad ar mheon Jordan, ar chúlra na spórt gairmiúil i saol na nAfra-Mheiriceánach agus ar an chúlchaint agus ar na hiaróga a bhí taobh thiar de scéal na Chicago Bulls.

Tugann Netflix deis dom fosta snas a chur ar an bheagán bheag Gearmáinise atá agam. Sea, tá iarrachtaí leanúnacha mírathúla ar siúl agam le Gearmáinis a fhoghlaim le breis agus 30 bliain. (Ní bheidh an teanga agam go deo mar ní bhíonn deis agam í a labhairt gach aon lá; ceacht iontach simplí i ndáiríre.)

Mar sin féin, is deas bheith in ann leabhar a chur i leataobh agus rud beag Gearmáinise a bhreathnú ar an scáileán. An scannán, Rising High/Betonrausch, a mheall mé an oíche faoi dheireadh: scéal bheirt rógairí;  iad ag iarraidh mol mór airgid a bhaint as margadh na dtithe i mBeirlín agus iad i bpáirt le lucht cam bainc. Scéal na hÉireann atá ann – auf Deutsch.

Bíonn na leabhair i gcónaí ann, ar ndóigh. Léigh mé Eachtraí Mara Phaidí Pheadair as Toraigh (Arlen House) le Séamus Mac a Bháird, leabhar a thaitin go mór liom. (Ní fhaca tú an léirmheas ar an tsuíomh seo? Mo náire thú!) Lena chois sin, tá mé díreach i ndiaidh cnuasach iontach gearrscéalta, Cnámh (Éabhlóid) le hEoghan Mac Giolla Bhríde a léamh, scríbhneoir comhaimseartha as Gaeltacht Dhún na nGall a insíonn scéalta comhaimseartha den scoth. Saothar an-bhreá ar fad.

Tá mé chomh seanfhaiseanta sin go bhfuil mo chuid ceoil ar fad ar CDanna go fóill. Bhí ceirníní agam lá den tsaol (cuir ceist ar mhamó); téipeanna ina dhiaidh sin (cuir ceist ar do dhaid) agus dlúthdhioscaí sa deireadh. Níl mé le tuilleadh airgid a chaitheamh lena bhfáil i bhformáid eile ar fad.

Mar sin féin, tá an éigeandáil ag tabhairt seans dom dul siar ar an bhailiúchán. Trí albam atá ag batráil na mballaí sa bhaile faoi láthair: Golden Age of Radio le Josh Ritter; Rodrigo y Gabriela, ceol giotáir den scoth (bhí siad mór i mBaile Átha Cliath lá den tsaol) agus Copperhead Road le Steve Earle, seancheann ó m’óige agus trioblóidí de chineál inteacht eile againn.

Castar na callairí suas go haon déag!