‘An Nollaig a Bhí’ le Máire Uí Ráinne an dán deireanach againn inár sraith bheag dánta i gcomhair na Nollag

An Nollaig a Bhí

Ba nós liom Oíche Nollag

cuairt a thabhairt abhaile

Go mothóinn draíocht na féile

ins an teaichín úd mar a chleacht mé.

Mo mháthair ag an doras romham

Ag fáiltiú romham le barróg

Is meangadh caoin deas m’athar

Ag fadú gríosach ar an teallach

B’aoibhinn liom an choinneal mhór

Is crann na soilse daite

An mainséar ins an bhfuinneog

Is coinnle geala i dtithe an bhaile.

Thagadh claochlú orm tamaillín

is bhínn arís i mo leanbh

Is mé ag dréim leis an bhfear mór údan

A bheadh ar cuairt againn roimh mhaidin.

B’ait liom an cáca rísíní

Is an blogam tae ina theannta

Cuairt shuáilceach na gcomharsan

Is deoch na Nollag lena mbeannacht.

Cuimhní cinn ár sinsir

Is ár muintir i bhfad ó bhaile

Is súil le Dia go mbeadh an Nollaig romhainn

Níos fearr ná an ceann a bhí caite.

Sheasainn ins an doras úd

Ag airdeall i chaon aird

Soilse neimhe is saolta

Go lonrach diamhrach i gcomhpháirt.

Tá an doras dúinte is na soilse múchta

Ní fheicfear coinnle Nollag feasta

Ach tá lóchrann síorgheal i mo chroí

Don dís a bhí agus atá ar marthain.

*D’fhoilsigh Cló Iar-Chonnacht cnuasach filíochta le Máire Uí Ráinne i mí na Nollag 2025, Cumraíocht