200 coir sceimhlitheoireachta admhaithe ag ‘ollbhrathadóir’ ón UVF i mBéal Feirste

Tá admhaithe ag Gary Haggarty, iarcheannaire an UVF i dtuaisceart Bhéal Feirste agus ollbhrathadóir, gur dhúnmharaigh sé cúigear agus gur ghlac sé páirt in 200 ionsaí sceimhlitheoireachta eile.

D’admhaigh Haggarty, atá faoi choinneáil chosanta ag an PSNI i láthair na huaire, go ndearna sé iarracht cúigear eile a dhúnmharú freisin, oifigigh de chuid na bpóilíní ina measc.

I measc an 200 coir sceimhlitheoireachta a d’admhaigh Haggarty baint a bheith aige leo i gCúirt na Corónach i mBéal Feirste ar maidin, bhí 25 cás comhcheilg um dhúnmharú agus ceithre choir a bhain le stiúradh sceimhlitheoireachta.

Gearrfar cúig phianbhreith saoil air as na dúnmharuithe, ach laghdófar go mór na pianbhreitheanna sin mar gheall ar an ról a bhí aige mar bhrathadóir faoin Acht um Choiriúlacht Thromchúiseach agus Póilíneachta.

Mharaigh sé gach duine den chúigear agus é ag obair mar bhrathadóir don tseirbhís phóilíneachta ó thuaidh. Ba iad na daoine a mharaigh sé John Harbinson, a bascadh chun báis i 1997 i Mount Vernon, Seán McParland, a caitheadh agus é ag tabhairt aire dá gharchlann i dteach a iníne i 1994, Éamon Fox agus Gary Convie ar scaoileadh leo agus iad i gcarr ar Shráid Thuaidh na Banríona i 1994, agus Seán McDermott, ar scaoileadh leis ina charr gar do bhaile Aontroma i 1994.

D’admhaigh Haggarty freisin go raibh baint aige le dúnmharú Peter

McTansey i 1991.

Bhí an fiosrúchán faoi Gary Haggarty ar bun le seacht mbliana anuas, agus é ar cheann de na fiosrúcháin is mó riamh a rinne an PSNI ó bunaíodh an tseirbhís.

Tá sé ina chónaí in áit rúnda i Sasana ó thairg sé eolas don tseirbhís phóilíneachta faoina chomhghleacaithe sa UVF. Is é an duine is sinsearaí riamh san eagraíocht sceimhlitheoireachta a thug eolas don tseirbhís phóilíneachta, agus bhí sé ina cheannaire ar an UVF i dtuaisceart Bhéal Feirste agus in oirdheisceart Aontroma.

Thug sé eolas freisin faoi roinnt póilíní, ar bhaill den RUC iad, a mhaígh sé a bheith ag obair as lámha a chéile le dílseoirí ó thuaidh agus iad i mbun sceimhlitheoireachta. Tá fiosrúchán eile ar bun faoi na líomhaintí sin i láthair na huaire.

Táthar ag súil go ngearrfar pianbhreith ar Haggarty níos deireanaí i mbliana ach go mbeidh an phianbhreith sin laghdaithe go mór mar gheall ar an mbrathadóireacht. Tá trí bliana caite sa phríosún aige cheana féin.