Thug ceoltóirí Macalla misneach do mhná 40 bliain ó shin – tá siad ar ais le chéile arís

Agus an laoch sin Bríd á ceiliúradh againn an mhí seo, is fiú cuimhneamh freisin ar mhná an cheoil a thug ardán agus inspioráid do chailíní agus do mhná óga eile lena n-ealaíona a chleachtadh agus barr a gcumais a bhaint amach.

Ceathracha bliain ó shin le linn sheachtain cheol tíre na príomhchathrach, shocraigh grúpa ceoltóirí agus amhránaithe a bhí ag cur fúthu i mBaile Átha Cliath ag an am go raibh leithcheal á dhéanamh ar mhná cumasacha ceolmhara ó thaobh ardán agus deiseanna a fháil a gcuid tallann a thaispeáint don saol mór.

Amhail an chircín bheag rua, shocraíodar má bhí beart le déanamh gur fánach a bheith á fhágáil faoin gcleas a bhí ag buachtáil ar an bhfaillí.

Cuimhnigh go raibh an saol corrach go maith ag mná na tíre seo sna 1980idí agus scannail go leor á nochtadh. Bhí ardú croí agus misneach agus muinín ag teastáil go géar ó mhná agus sin a thug Macalla dúinn.

Tháinig breis is scór amhránaithe agus ceoltóirí le chéile dá gcéad cheolchoirm in Óstán an Ormond ar na céanna ar an 8 Márta 1984. Má bhí cruthúnas ó aon duine go raibh fíbín chun ceoil ar an bpobal, chuir an scuaine a cuireadh ó dhoras ón teach lán an tráthnóna sin deireadh le haon amhras.

Ceiliúradh a bhí sa gcéad cheolchoirm stairiúil sin ar an saibhreas ceoil is amhrán a bhí ag na mná cruthaitheacha seo.

Is iomaí ceolchoirm a rinne an grúpa ban sna ceithre bliana ina dhiaidh sin agus bhí an-ráchairt go deo ar a gceirnín Mná na hÉireann a d’fhoilsigh Gael Linn. Cé a dhéanfadh dearmad ar an gclúdach suaithinseach a dhear Pauline Bewick?

Eagraíodh ceolchoirm chomórtha in Halla na Saoirse in 2004 agus i mbliana, tá Gael Linn, na mná agus cuid dá sliocht ag ceiliúradh 40 bliain den cheol sin sa Sugar Club ar Shráid Leeson, Lá Idirnáisiúnta na mBan, an 8 Márta.

Beidh an-oíche go deo ann ach cuimhnígí go bhfuil an áit beag agus bíodh do thicéad in áirithe in am agat.