Taraif 20% fógartha ag Trump ar earraí as an Aontas Eorpach, díolúine ag earraí cógaisíochta

Tá fógartha ag Donald Trump go ngearrfar taraif 20% ar earraí a iompórtáiltear go dtí Stáit Aontaithe Mheiriceá as an Aontas Eorpach.

Dúirt an Taoiseach Micheál Martin nach raibh na taraifí nua “inchosanta”, gur “údar mór aiféala” iad agus go ndéanfaidís dochar don gheilleagar domhanda.

“Feictear dúinn nach bhfuil sé seo inchosanta. Déantar earraí ar fiú €4.2 billiún iad a thrádáil idir an tAE agus Stáit Aontaithe Mheiriceá gach lá.

“Ní chun leas aon duine é cur as don dlúthchaidreamh seo. Boilsciú níos airde an toradh a bhíonn ar tharaifí agus goileann siad ar dhaoine ar an dá thaobh den Atlantach.

“Déanfaimid ár machnamh i gcomhar lenár gcomhghleacaithe san AE ar cad ba cheart dúinn a dhéanamh anois.”

Dúirt sé gur chóir go mbeadh freagra an AE “tomhaiste”.

“Anois tráth na cainte, agus creidim gurb é an t-aon bhealach chun cinn a bheadh stuama ná ceann atá bunaithe ar idirbheartaíocht.”

Dúirt an Taoiseach nach chun leas aon dream an t-achrann.

“Is féidir linn teacht slán agus tiocfaimid slán,” ar sé.

Údar faoisimh don rialtas abhus gur cosúil go bhfuil díolúine go fóill ag earraí cógaisíochta ó na taraifí nua.

Agus taraifí cómhalartacha á bhfógairt aige ar thíortha ar fud an domhain, dúirt Trump tráthnóna go raibh tíortha an AE “an-chairdiúil” ach gur “lom” siad Stáit Aontaithe Meiriceá.

“Is bocht an scéal é, is díol trua ar fad é,” arsa Uachtarán Stáit Aontaithe Mheiriceá ag a ócáid ‘Make American Wealthy Again’ ag an Teach Bán.

Dúirt sé gur 39% an t-easnamh sa trádáil idir Stáit Aontaithe Mheiriceá agus an tAE agus gur bunaithe air sin a bhí an taraif 20% atá á ghearradh ar an AE.

D’fhógair Trump go ngearrfadh Stáit Aontaithe Mheiriceá taraifí cómhalartacha ar thíortha ar fud an domhain. Buntaraif 10% a bheidh i gceist, ach gearrfar taraifí níos mó ar thíortha eile, Éire agus tíortha eile an AE ina measc. Seo iad na tíortha is mó, a mhaígh Trump, a n-éiríonn leo buntáiste a bhreith ar Stáit Aontaithe Mheiriceá ó thaobh na trádála.

Bhí an tSín ar bharr an liosta ar an gcairt a thóg Trump amach chun na taraifí cómhalartacha a mhíniú. Dúirt sé go ngearrann an tSín taraif 67% ar Stáit Aontaithe Mheiriceá agus go raibh leath de sin, taraif nua 34%, á ghearradh ar an tSín dá bharr

“Inniu Lá na Saoirse,” arsa Trump i nGairdín na Rósanna ag an Teach Bán.

“Cuimhneofar go deo ar an 2 Aibreán 2025 mar an lá gur deineadh athbheochan ar earnáil tionsclaíochta Stáit Aontaithe Mheiriceá.

“Ar feadh blianta creachadh ár dtír, rinne náisiúin ar fud an domhain, idir chomhghuaillithe agus naimhde, slad, scrios agus lot uirthi.”

Mhaígh Trump go gcuirfeadh na taraifí cómhalartacha tús le “ré ógra Mheiriceá” agus go bhfillfeadh “poist agus monarchana” ar ais go tréan go dtí an tír.

Dúirt Trump go ndéanfadh a pholasaí nua taraifí “na trilliúin agus na trilliúin dollar” do Stáit Aontaithe Mheiriceá agus gur laghdú ar chánacha agus ar an bhfiachas náisiúnta an toradh a bheadh air.

Bhí Rialtas na tíre seo ag glacadh leis go ngearrfaí taraifí 20% ar earraí ó gach tír san Aontas Eorpach ón lá amárach ar aghaidh agus chuir siad fainic go bhféadfadh laghdú 50% a bheith ar easpórtálacha earraí cógaisíochta as an tír seo go dtí na Stáit Aontaithe as seo go ceann cúig bliana de bharr na dtaraifí nua.

Is cosúil go bhfuil díolúine go fóill ag earraí cógaisíochta ó na taraifí nua.

Ní fios go fóill cén freagra a thabharfaidh an tAontas Eorpach ar na dleachtanna nua, ach beidh súil ag daoine sa tír seo go gcuirfear san áireamh an tionchar a bheidh ag taraifí díoltais ar earnálacha agus tíortha faoi leith.

Is é bun is barr chogadh trádála seo an Uachtaráin Trump go dteastaíonn uaidh an bhearna idir luach na n-earraí a cheannaíonn Meiriceá thar teorainn amuigh agus luach na n-earraí a dhíolann sí le tíortha eile a laghdú.

Tá sé ráite ag an Taoiseach Micheál Martin go n-athróidh na taraifí seo ar earraí an Aontais Eorpaigh “an seanchóras ó bhonn”.