Scoileanna ‘satailíte’ nó Gaelcholáistí neamhspleácha a theastaíonn seachas aonaid Ghaeilge – Gaeloideachas

Deir an eagraíocht oideachais Ghaeilge go bhfuil siad “buartha” go mbunófaí tuilleadh aonaid ar an mhúnla reatha, múnla nach bhfuil ag teacht leis an taighde idirnáisiúnta

Scoileanna ‘satailíte’ nó Gaelcholáistí neamhspleácha a theastaíonn seachas aonaid Ghaeilge – Gaeloideachas

Tá sé deimhnithe ag an eagraíocht Gaelscoileanna nach mbeidh siad ag tacú le polasaí na Roinne Oideachais aonaid Ghaeilge a bhunú in iarbhunscoileanna Béarla feasta.

Tá an eagraíocht oideachais ag éileamh go mbunófaí aonaid Ghaeilge a bheadh ag feidhmiú mar “scoileanna satailíte faoi chúram iarbhunscoil lán-Ghaeilge go mbeidh an stádas neamhspleách bainte amach”.

Níor cheart aonaid Ghaeilge a bhunú “mura mbíonn tumoideachas iomlán ar fáil mar pholasaí agus mar chleachtas” a deir Gaeloideachas.

Tá Gaeloideachas ag éileamh freisin go gcuirfeadh an Roinn Oideachais agus Scileanna sainmhíniú ar fáil ar a bhfuil i gceist leis na haonaid reatha lán-Ghaeilge.

Dúirt Clár Spáinneach ó Ghaeloideachas go raibh an eagraíocht ag stocaireacht le blianta fada faoi fhiúntas na n-aonad Gaeilge i scoileanna Béarla.

Dúirt sí go raibh siad “buartha” go mbunófaí tuilleadh aonaid ar an mhúnla reatha agus gur gaelcholáistí neamhspleácha an rogha a bheadh á moladh ag Gaeloideachas.

Faoi mhúnla reatha na n-aonad Gaeilge, níl “cinnteacht” ag tuismitheoirí go mbeidh oideachas lánGhaeilge ar fáil dá bpáistí.

“Gaelcholáistí neamhspleácha an múnla is fearr chun an tumoideachas a chur ar fáil agus tá sin cruthaithe ag taighde idirnáisiúnta,” a dúirt Clár Spáinneach le Tuairisc.ie.

Tuigtear go bhfuil an múnla nua – scoileanna satailíte faoi chúram iarbhunscoil lán-Ghaeilge – mar atá á éileamh ag Gaeloideachas molta mar réiteach fadtéarmach ar na deacrachtaí i gColáiste Lú ó thús na scoilbhliana.

Tá a bhfuil i ndán do Choláiste Lú, aonad Gaeilge atá ag feidhmiú i gColáiste Chú Chulainn i nDún Dealgan, idir dhá cheann na meá toisc titim mhór a bheith ar líon na n-ábhar atá á gcur ar fáil i nGaeilge san aonad.

Dúirt urlabhraí Ghrúpa tuismitheoirí Choláiste Lú,  Aidan Kinsella le Tuairisc.ie, go bhfuil siad ag glacadh leis anois go bhfuil deireadh le Coláiste Lú agus gur deis a bheadh i scoil satailíte “tús úr a chur le hoideachas lán-Ghaeilge i nDún Dealgan”.

Fág freagra ar 'Scoileanna ‘satailíte’ nó Gaelcholáistí neamhspleácha a theastaíonn seachas aonaid Ghaeilge – Gaeloideachas'

  • Mairéad

    Is naíscoileanna dhátheangacha iad na naíscoileanna Gaeltachta le “haonaid” dos na cainteoirí dúchais i gcuid acu.
    Níl treoir dá laghad sa bPolasaí Oideachais Gaeltachta dos na naíscoileanna.
    Braitheann gach rud ar na coistí agus is deacair seasamh a thógáil chun na cainteoirí ó dúchais a chosaint ó bhrú an Bhéarla.