Níl Putin i ndáiríre faoi stop a chur leis an gcogadh anois. Deir daoine go bhfuil an cogadh ‘buaite’ aige agus ‘caillte’ ag an Úcráin mar go bhfuil talamh gafa ag an Rúis agus caillte ag an Úcráin. Ach ní dhearna Putin ionradh ar an Úcráin chun roinnt críocha a ghabháil. Rinne sé ionradh ar an Úcráin chun an tír iomlán a chur faoi smacht na Rúise agus réimeas pro-Rúiseach (agus mídhaonlathach dá réir) a chur i gcumhacht i gCív.
Tá seo ráite go soiléir arís agus arís eile ag Putin agus náisiúntóirí/impiriúlaithe na Rúise ach go n-úsáideann siad friotal éagsúil chun é rá. Bíonn siad ag caint ar a bheith ag cur deireadh le ‘bréag-náisiún’ na hÚcráine nó ag ‘díNaitsiú’ na hÚcráine nó ag cur ‘cóir leighis’ ar an ‘ngalar síceolaíoch’ atá ar Úcránaigh, galar a fhágann go gcreideann siad nach Rúisigh iad. Nó mar, a déarfadh Putin fhéin, ag athchruthú aontacht stairiúil na Rúise agus na hÚcráine atá siad.
Ní hamháin nach bhfuil an aidhm seo bainte amach, ach má stopann an cogadh anois is a mhalairt glan a bheidh tarlaithe de bharr gach rud atá déanta ag Putin ó thosaigh sé an cogadh i gcoinne na hÚcráine in 2014. Roimhe sin bhí formhór na nÚcránach ag iarraidh a bheith mór leis an Rúis agus leis an Iarthar. Anois mar thoradh ar fhoréigean na Rúise, tá tromluí Putin fíoraithe aige féin – is í an Úcráin i ndáiríre an ‘fhrith-Rúis’ a labhraíonn idé-eolaithe na Rúise fúithi, ach ní mar gheall ar ghalar síceolaíoch a bheith ar Úcránaigh nó iad a bheith gafa ag an diabhail nó curtha faoi gheasa ag an Iarthar, mar a deir na hidé-eolaithe, ach mar gheall ar bharbarthacht na Rúise ina leith.
Dealraíonn sé nach straitéis mhaith caidreamh poiblí é a bheith ag marú agus ag céasadh baill de do spriocphobal, ag fuadach a bpáistí agus ag scriosadh a gcathracha.
Tá meascán den realpolitik agus den idé-eolaíocht ag baint le Putin, ach cé gur fear realpolitik den scoth é, is idé-eolaíocht is mó atá ag tiomáint a ionraidh ar an Úcráin. Ní thuigeann Trump é seo mar is é an bealach eile timpeall a oibríonn a intinn siúd. Ceapann sé gur ionann agus idirbheartaíocht faoi mhargadh réadmhaoine é teacht ar réiteach idir an Rúis agus an Úcráin.
Cheap an tUachtarán mar a phríomhthoscaire chun na Rúise Steve Witkoff, fear gnó nach bhfuil saineolas ar bith aige faoin Rúis, faoin Úcráin ná faoin taidhleoireacht, ach a bhfuil cúlra aige san infheistíocht réadmhaoine. Mar sin, tá sé éasca do Putin dallamullóg a chur ar Witkoff agus ar Trump agus leanúint air ag moilleadóireacht maidir le hiarrachtaí síochána. Do Trump níl anseo ach fianaise go bhfuil Putin ag déanamh an rud a dhéanfadh idirbheartaí cliste ar bith i gcúrsaí gnó chun an margadh is fearr a fháil dó féin.
Níl aon rún ag Putin deireadh a chur leis an gcogadh agus an chuid is mó den Úcráin a bheith caillte go deo ag an Rúis. Ach oireann sé dó leanúint air ag plámás le Trump ar dhá chúis. Ar an gcéad dul síos tá ag éirí leis éalú ó aon smachtbhannaí Meiriceánacha breise a dhéanfadh dochar eacnamaíochta don Rúis.
Ar an dara dul síos, má imríonn Putin a chuid cártaí go cliste, nuair a theipfidh ar an bpróiseas ar deireadh beidh seans níos mó go gcuirfidh Trump an milleán ar an Úcráin. Agus má chuireann Trump an milleán ar an Úcráin beidh praghas le híoc – deireadh ar a laghad le cúnamh faisnéise Mheiriceá d’fhórsaí na hÚcráine, rud a mhéadódh an seans go mbuafadh Putin an cogadh i ndáiríre.
Ó thaobh Trump de is léir gur maith leis a bheith ag imirt ról an cheannaire domhanda atá chun deireadh a chur le cogadh na hÚcráine, ach is léir freisin gur beag foighne atá aige leis an taidhleoireacht fhadálach fhoighneach a bhíonn i gceist i ndáiríre le deireadh a chur le cogadh casta achrannach. Ní haon George Mitchell nó Bill Clinton é. Dar ndóigh tuigeann Volodymyr Zelensky agus na ceannairí Eorpacha é seo go maith.
Tuigeann siad freisin go bhfuil dallamullóg ar Trump faoi Putin ach nach bhfuil aon slí gur féidir leo sin a chur ina luí air. Ach is gá dóibh fanacht cairdiúil leis ionas go leanfar den roinnt faisnéise leis an Úcráin, le díolachán airm áirithe nach féidir a fháil áit ar bith ach ó Mheiriceá, agus mar gur fada na hEorpaigh ó bheith ábalta seasamh ar a gcosa fhéin ó thaobh cúrsaí slándála.
Luath nó mall áfach éireoidh sé soiléir fiú do Donald Trump go bhfuil teipthe air deireadh a chur leis an gcogadh. Agus ag an bpointe sin beidh sé ag lorg dream éigin seachas é féin chun an milleán a chur orthu. Ní próiseas síochána é seo ach cluiche marfach cathaoireacha ceoil. An t-aon cheist ná cé a bheidh fanta ina sheasamh nuair a stopfaidh an ceol?
Sinéad de Róiste
Is miotas a rá go ndearnadh Putin ionradh ar an Úcráin ar mhaithe le seilbh iomlán a ghlacadh ar an tír. B’é slándáil na Rúise agus an bhagairt ó NATO an tús-scéal a bhí aige, agus ansin ceisteanna críocha is teanga.
Ach má tá Fachtna ceart nach teip a bheadh ar an Rúis dá nglacfadh an Úcráin le stádas neodrach ach neamhspleách i gcríochaibh laghdaithe? Nach cóir mar sin go molfadh Fachtna glacadh leis na téarmaí a aontaíodh in Alasca in ionad leanacht le cogadh nach féidir leis an Úcráin buachaint?
Donncha Ó hÉallaithe
A Shinéad, a chomrádaí, na creid gach a scríobhann Eoin Ó Murchú faoi cheist achrannach na hUcráine!
Ciarán Ó Coigligh
I gcead d’Fhachtna Ó Drisceoil, ‘[TÁ] an [tUachtarán Vlaidimir] Púitin i ndáiríre faoi stop a chur leis an [nGníomhaíocht Mhíleata Speisialta] anois.’ An té a mbeadh oiread na fríde de stair na Rúise ar eolas aige bheadh a fhios aige go mba í Cív príomh-chathair dhomhan na Rúise tráth den tsaol. Rinne an tUachtarán Púitin ionradh ar an Úcráin le cosaint a thabhairt do phobal oirthear na hÚcráine a raibh 12,000 acu dúnmharaithe ag an ngiunta a chuir an tIarthar i gceannas ar an Úcráin; agus leis an Rúis a chosaint ó bhagairt Eagras Chonradh an Atlantaigh Thuaidh (ECAT / NATO) ar thalamh na hÚcráine. Ní fíor gur leis ‘an tír iomlán a chur faoi smacht na Rúise agus réimeas pro-Rúiseach (agus mídhaonlathach dá réir) a chur i gcumhacht i gCív’a túsaíodh an Ghníomhaíocht Mhíleata Speisialta. Más daonlathas atá san Úcráin le cosc ar fhreasúra, ar thoghcháin, agus ar chultúr na Rúise, b’fhearr an daonlathas céanna chur go dtí an diabhal.
Is pobal bródúil pobal na Rúise agus is suarach an mhaise don Uasal Ó Drisceoil a bheith ag caitheamh anuas orthu mar dhóigh de is gur dream suarach iad ina ‘náisiúntóirí/impiriúlaithe’. Ní miste deireadh a chur “le ‘bréag-náisiún’ na hÚcráine” agus ‘dí-Naitsiú’ na hÚcráine a chur i gcrích agus aontacht stairiúil na Rúise a chur ar bun an athuair go fiú má fhágtar an chuid thiar den Úcráin ina stát neamhspleách ar leith ach gan aon bhunáit de chuid ECAT ann.
Ní hé an tUachtarán Púitin a thosaigh an cogadh i gcoinne na hÚcráine in 2014. Is é an chaoi ar thosaigh rialtas puipéad na hÚcráine ag géarleanúint agus ag dúnmharú chainteoirí Rúiseacha oirthear na hÚcráine. ‘Roimhe sin bhí formhór na nÚcránach ag iarraidh a bheith mór leis an Rúis agus leis an Iarthar’ nó gur chuir an tIarthar ladar sa scéal, gur chuir an rialtas dlisteanach de dhroim seoil agus gur chuir rialtas i gceannas a raibh col acu le cultúr na Rúise agus lena n-oidhreacht stairiúil féin. Tá tost an Uasail Uí Dhrisceoil i dtaobh fhoréigean agu bharbaracht na hÚcráine i gcoinne a muintire féin ó 2014 fíor-shuntasach.
Dá dtogródh an Rúis é thógfaí Cív in achar gairid. Chúlaigh an Rúis as Cív le deis a thabhairt do chainteanna comhréitigh. Tá 20% de thalamh na hÚcráine faoi smacht na Rúise sa gceann thoir den Úcráin agus is leor sin le cosaint a thabhairt do phobal oirthear na hÚcráine a chosaint ón ár agus ón díothú.
Tá beag is fiú dá dhéanamh de chumas idirbheartaíochta polaitíochta an Uachtaráin Trump ag Fachtna Ó Drisceoil in ainneoin a bhfuil de ghaiscí móra déanta ag an Trumpach in achar gearr leis an tsíocháin a chothú idir an Airméin agus Azerbaijan; Poblacht Dhaonlathach an Chongó agus Rwanda; an Iaráin agus Iosrael; an India agus an Phacastáin; an Chambóid agus an Téalainn.
Bhí an dream a bhfuil forlámhas acu ar an bpolaitíocht, ar an oideachas, ar na meáin agus ar earnáil na siamsaíochta, leithéidí Fhachtna Uí Dhrisceoil, ag maíomh go dtroidfeadh an tIarthar go gcloífí an Rúis ba chuma cén t-achar a thógfadh sé sin. Tá milliún go leith, saighdiúirí Úcránacha a bhformhór, básaithe anois. Ansin dúradh nach raibh aon chuma ar arm na Rúise ná aon tacaíocht ag an Uachtarán Púitin i measc phobal na Rúise. Tá 20% den Úcráin gafa ag an Rúis agus tuilleadh talún dá ghabháil de réir a chéile; agus liostáil Rúisigh as éadan in arm na Rúise. Tá arm na hÚcráine ar an dé deiridh agus 69% den phobal ag iarraidh síochána. Tá daoine idir óg is sean dá bhfuadach ag póilís na hÚcráine lena n-úsáid mar shaighdiúirí (neamhthoilteanach neamhoilte) in éadan na Rúise.
Tá buaite ag an Rúis ar an Úcráin, ar an Aontas Eorpach, ar Eagras Chonradh an Atlantaigh Thuaidh (ECAT) agus ar nua-chaomhaithe SAM. Tá deireadh leis an domhan aon-chumhachta polaitíochta agus tá ré nua il-pholach nó il-chumhachtaí polaitíochta ag teacht chun cinn atá bunaithe ar shibhialtachtaí agus ní hea ar chumhacht mhíleata, eacnamaíochta ná pholaitíochta.
Tá athnuachan na sibhialtachta Críostaí faoi lántseol sa Rúis, san Ungáir, sa bPolainn agus b’fhearr go mór fada d’Éirinn dáimh a léiriú leis an gclaochlú iontach seo a chothaíos an bheatha, an pósadh dúchasach agus an teaghlach agus ní hea cultúr an bháis.
An Críostaí Cráifeach
Nach mór an peaca é nár fhág an junta i gCív rogha ar bith ag Putin ach milliún go leith Úcráineach a mharú ar mhaithe le cultúr an bheatha agus na Críostaíochta a chur chun cinn?