Iarracht ar bun cur le líon na n-iontrálacha ar Vicipéid na Gaeilge faoi chúrsaí LADT

maiTá duaiseanna le bronnadh ag Pobal Wikimedia na hÉireann ar údair na n-alt is fearr a bhaineann le cúrsaí LADT ar an Vicipéid. Deir Oifigeach Gaeilge na heagraíochta, Amy Uí Ríordáin, go bhfuil “bearna” le líonadh ar an Vicipéid – an leagan Gaeilge de Wikipedia – ó thaobh cúrsaí agus pobal LADT. Deir Uí Ríordáin go bhfuil an comórtas á reáchtáil le daoine a spreagadh tuilleadh alt faoi dhaoine, ócáidí, eagraíochtaí, agus eachtraí staire a scríobh.

Bronnfar trí dhuais ar údair na n-alt is fearr: €100 don chéad áit, €75 don dara háit, agus €50 don tríú háit.

“Tá feachtas ar siúl faoi láthair darb ainm Queering Wikipedia, agus tá an feachtas céanna ar siúl againne ar an Vicipéid – ‘Aiteachas a Chur ar an Vicipéid’. Tá bearna le líonadh maidir le cúrsaí agus ábhar LADT,” a dúirt Uí Ríordáin le Tuairisc.

Bhí comórtas grianghrafadóireachta ar siúl ag an Vicipéid cheana le cur le líon na n-íomhánna a bhaineann le cúrsaí LADT. Chuir úsáideoirí na Vicipéide grianghraif “d’fhéilte bróid, lánúineacha LADT, agus imeachtaí aiteacha” le bunachar grianghraf an tsuímh agus tá na híomhánna sin ar fáil d’eagarthóirí na n-alt le cur leis na hailt a scríobhfar don chomórtas reatha.

“Tá níos mó ná 60,000 alt i nGaeilge ar an Vicipéid anois, ach níl ach 50 leathanach ann do rudaí a bhfuil baint acu le rudaí aiteacha. Tá an-jab déanta ag pobal Vicipéide na Spáinnise. Níl an figiúir agam do na teangacha eile, ach tá an-chuid oibre déanta ag na Spáinniseoirí agus tá go leor leathanach ar an leagan Béarla freisin,” a dúirt Uí Ríordáin.

Mhínigh sí go mbíonn sé deacair in amanna alt a scríobh faoi dhuine ón stair a meastar a bhí aiteach mar gheall ar rialacha daingne na Vicipéide faoi thagairtí agus foinsí. Dúirt sí go bhfuil “easpa foinsí” ann ach go bhfuil taighde nua á déanamh “gach bliain” a dhéanann obair na n-údar Vicipéide “i bhfad níos éasca”.

“Má tá duine tar éis bás a fháil gan foinsí crua a fhágáil go raibh siad aerach, leispiach, nó trasinscneach ní féidir na sonraí ar an Vicipéid a athrú. Ach tá taighde idir lámha ag daoine an t-am ar fad agus tagann foinsí nua chun cinn. Mar shampla, fuair muid eolas nua ón Dr Mary McAuliffe faoi Kathleen Lynn le déanaí agus mar gheall gur foinse fhoilsithe atá ann, is féidir é a chur ar an Vicipéid.

“Bíonn deacrachtaí eile ann i dteangacha eile. Bíonn terfs (trans exclusionary radical feminists) ar Vicipéid na Fraincise a athraíonn forainmneacha na ndaoine trasa ar an suíomh. Níl sé feicthe agam ar an Vicipéid Ghaeilge, níl an pobal chomh mór sin go mbeadh deacrachtaí móra againn mar sin, agus níl aon fhadhb ann fós ach tá súil agam nach mbeidh,” a dúirt sí.

Tá liosta alt ar an ‘Deais’ d’alt nach bhfuil scríofa ar an Vicipéid fós – Bród Chléire, An Foclóir Aiteach, agus Queercal Comhrá, mar shampla – agus súil ag Uí Ríordáin go gcruthóidh údair na Vicipéide ailt iomlána do na hábhair sin mar chuid den chomórtas.

“Tá an Vicipéid ag feabhsú an t-am ar fad agus ba bhreá linn an feabhas sin a fheiceáil ar na leathanaigh aiteacha freisin. Tá cúpla leathanach ann atá go maith cheana féin – na leathanaigh faoi Bhród na Gaeltachta, Bród Bhaile Átha Cliath agus an t-aisteoir aiteach Aiden Gillen. Tá an leathanach faoin gcomharghrúpa AerachAiteachGaelach thar barr ar fad,” a dúirt Uí Ríordáin.