I mbeatha manaigh
Is fánach an áit go bhfaighfeá scéal beag do Dhialann Toghcháin ar sheirbhís nuachta Gaeilge.
Bhíomar ag éisteacht an lá cheana leis an bpodchraoladh Crime World le Nicola Tallant agus Gerry ‘The Monk’ Hutch, an coirpeach aitheanta atá ag seasamh i mBaile Átha Cliath Láir, á chur faoi agallamh aici.
Chuireamar cluas le héisteacht ceart orainn féin nuair a thosaigh Hutch ag míniú cad as a tháinig a leasainm.
“I got it about 94 or 95, in around that era,” arsa Hutch. “The guards had me under surveillance and there was this reporter by the name of Harry Magee, a nice lad, and I think he ended up a political correspondent…”
Harry Magee s’againne! An t-iriseoir leis an Irish Times agus cainteoir líofa Gaeilge a bhíonn go minic ag roinnt a chuid saineolais linn ar chláir Ghaeilge.
Dúirt Hutch gurb amhlaidh gur tháinig Harry go dtí a áit chónaithe á lorg agus gur thosaigh an t-iriseoir ag cur ceisteanna faoi ar na gardaí faoi rún a bhí ag faire a thí. Dúirt na Gardaí le Harry nach mbíodh Hutch ag ól ná ag dul amach puinn agus nár fhág sé an tigh ó tháinig sé ar ais ón siopa físeán dhá lá ó shin agus ceithre scannán aige.
“And Harry said to him, ‘This fella must live like a monk.’ And that’s where it came from,” arsa Hutch.
Tá an scéal “cruinn go maith” ag Hutch, a deir Harry Magee le Dialann Toghcháin.
“Nuair a rinneadh an robáil ar Brinks Allied i 1995, jab inar goideadh £3 mhilliún, bhí go leor cainte faoi mar gheall ar an dánaíocht a bhain leis agus an méid pleanála a chuaigh isteach ann agus bhí buíon Hutch á lua leis.
“Scríobh mise píosa fada faoi don Irish Press agus ní raibh cead ag an am aon tagairt a dhéanamh do mhuintir Hutch agus an choiriúlacht agus bhí orm ‘a prominent north-inner city crime family’ nó rud éigin mar sin a thabhairt orthu. Bhí sé deacair agus as an deacracht sin a tháinig an leasainm.”
Chuaigh Harry ag fiosrú faoi Gerry Hutch agus fuair sé amach go raibh “stíl dhifriúil” aige i gcomparáid le coirpigh eile.
“Níor ól sé, níor chaith sé tobac, níor chuaigh sé amach mórán. Bhí sé ag tógáil clainne go ciúin ina theach i gCluain Tarbh agus é scoite amach ón áit arb as dó i lár na cathrach. Thug mé ‘The Monk’ air dá bharr sin.
“Thaitin sé mar leasainm le Paddy Clancy a bhí ag scríobh don Sun ag an am agus bhain sé úsáid as an tseachtain dár gcionn agus ansin tar éis tamaill scaip sé.”
Harris bacach
Cad a d’imigh ar an bhfuinneamh nua sin go léir?
‘Simon Harris insists Fine Gael is not on the back foot in election campaign’ a dúirt an cheannlíne nuachtáin inné. An bhfuil an ‘Harris Hop’ éirithe bacach cheana féin. Agus má tá cad a bhain an hap as Harris?
An mar sin a éagann ‘hop’, ar hap an tairne?
Réalta nua?
Éamon Ó Cuív an t-imreoir nua mór le rá atá sínithe ag Nuacht TG4 do laethanta an chomhairimh. Ní hé nach bhfuil fios na slí ag Ó Cuív go dtí stiúideonna Bhaile na hAbhann agus Chasla, ach seo an chéad uair aige a bheith ina lán-bhall d’fhoireann anailíse TG4 seachas a bheith ar iasacht ó lucht Fhianna Fáil. Agus saol an Teachta Dála fágtha ina dhiaidh aige ní chuirfeadh sé iontas orainn dá ndéanfadh Ó Cuív tráchtaire polaitíochta géarchúiseach tuisceanach. Coimeád súil air. Ábhar réalta is ea an buachaill seo.
Is cosúil go mbeidh cuid mhaith piardaí móra eile i mbun anailíse ar an gcomhaireamh ar TG4, ina measc an t-iar-aire agus iarThánaiste Mary Coughlan, iarcheannaire Fhine Gael Alan Dukes, an Feisire Eorpach Seán Kelly, an t-iarfheisire Eorpach Liadh Ní Riada, an t-iar-aire stáit Gaeltachta Dinny McGinley, an t-iar-phreasrúnaí rialtais Eoghan Ó Neachtain agus an t-iarsheanadóir Pádraig Ó Céidigh.
Kerry Blue
An mbaineann an Hutch réamhluaite le hord na gCaipisíneach, de sheans, agus é ar aon dul agus ar aon intinn leis an gcráiteachán seo;
“Sibhse a charas an t-ól go mór is feoil Aoine,
Is gach iomlot spóirt ón mbord go leaba aoibhinn,
Flaitheas na glóire más dóigh gur gealladh daoibhse,
Mealladh go mór iad ord na gCaipisíneach.”