Buaiteoirí Ghradaim Chumarsáide an Oireachtais 2018 fógartha ag Oireachtas na Samhna i gCill Airne

Bronnadh naoi ngradam ar fad ag ócáid bhronnta Ghradaim Chumarsáide an Oireachtais in Ionad an INEC i gCill Airne anocht.

I measc na ndaoine ar bronnadh gradam orthu, bhí an t-iriseoir Duibhneach Seán Mac an tSíthigh ó Nuacht RTÉ/TG4 a bhuaigh ‘Iriseoir na Bliana’, Caitlín Nic Aoidh as Tír Chonaill, a thug léi an gradam do ‘Pearsa Teilifíse na Bliana’ agus Helen Ní Shé, láithreoir An Saol Ó Dheas ar éirigh léi sa rannóg ‘Pearsa Raidió na Bliana’.

Ba í an tsraith faisnéise Camino an tSáile, cuntas ar an iomramh a dhein meitheal fear ó Chorca Dhuibhne is iad ag iarraidh lorg na n-oilithreach a leanúint go Santiago de Compostela, a bhuaigh ‘Sraith Teilifíse na Bliana’.

Thug Song of Granite, an fadscannán faisnéise faoin amhránaí Joe Éinniú as Carna i gConamara leis an gradam do ‘Scannán/Clár Teilifíse na Bliana’.

Sraith de chuid BBC Raidió Uladh, Seo an Saol, a bhíonn á cur i láthair ag Treasa Bhreathnach agus Proinsias Ó Coinn, a tháinig sa chéad áit sa rannóg ‘Sraith Raidió na Bliana’.

Den chéad uair, bronnadh gradam i mbliana do ‘Feachtas Meán Sóisialta na Bliana’ agus ba é feachtas Chiara Ní É #Nílsécgl, a bhuaigh an duais sin.

Ba ar Damien Ó Dónaill, craoltóir aitheanta le Raidió na Gaeltachta, a bronnadh Gradam Réalta Óg na Bliana, gradam ar vótáil an pobal dó.

Bronnadh Buaicghradam Cumarsáide na bliana ar iarleas-cheannaire TG4 Pádhraic Ó Ciardha.

Is painéal moltóirí a roghnaigh na buaiteoirí i ngach ceann de na rannóga seachas ‘Réalta Óg na Bliana’.

Seo thíos liosta iomlán na mbuaiteoirí do Ghradaim Chumarsáide an Oireachtais 2018.