‘Bhí an-bhliain ag Le Boom agus níor chloígh muid le riail ar bith’

Céard í an chuimhne is mó a bheidh agat ar 2025?

Fuaim na rothaí beaga ag bun ár gcásanna taistil ag rothlú agus ag scrábadh ar sráideanna agus ar chosáin agus muid ag bogadh ó chathair go cathair, ó chlub go club. Dúnaim mo shúile agus cloisim fós é.

Céard é an scéal is mó a chuir áthas ort in 2025?

Connolly mar Uachtarán na hÉireann agus ar ndóigh foireann sacair na hÉireann ag dul ar aghaidh go play-offs an Choirn Dhomhanda.

Céard é an scéal is mó a chuir brón ort in 2025?

Bhí agus tá an oiread sin scéalta uafásacha ag tíocht ó Ghaza chuile lá nach féidir liom aon cheann amháin acu a phiocadh.

Céard é téama 2025 duitse?

Dhom fhéin, go pearsanta, bhí ana-chuid bróid agus tírghrá ag baint leis an mbliain seo. Ós rud é go raibh muid ag casadh go leor leor seónna thar lear – san Astráil, sa RA agus thart timpeall na hEorpa, chonaic muid an oiread éilimh atá ar rudaí agus ar dhaoine Éireannacha faoi láthair – bhí sé le brath ní hamháin ó thaobh an cheoil de ach ó thaobh aisteoirí, ealaíontóirí, scríbhneoirí, dearthóirí agus a leithéidí de chomh maith. Bhí an-chuid bróid orainn fhéin agus muid ag bogadh thart, ó chathair go cathair ag cur ‘Gael Raves’ ar siúl – iad plódaithe chuile oíche cibé cén áit a raibh muid. An oiread measa a bhí ag daoine fiú ar an teanga agus muid á labhairt, bhí sé speisialta ar fad.

Ó thaobh cúrsaí cultúir agus siamsaíochta de, cad iad na cláracha, leabhair nó podchraoltaí is mó a chuaigh i bhfeidhm ort i mbliana?

Bhreathnaigh mé ar an gclár Say Nothing ag tús na bliana – dochreidte mar is eol do chuile dhuine.

Léigh mé Close To Home le Michael Magee – ceann de na leabhair is fearr atá léite agam le deireanaí.

Chonaic mé Portia Coughlan den chéad uair i mbliana – ní dráma nua é seo, ar ndóigh, ach chuaigh sé i bhfeidhm go mór orm.

Céard é an rud is mó a d’fhoghlaim tú i mbliana?

Muinín an rud is mó, dar liom. D’fhoghlaim muid go bhfuil muid i bhfad níos fearr as nuair nach n-éisteann muid an iomarca le comhairle ó dhaoine sa ‘tionscal ceoil’ (no offence dóibh) – i bhfad níos fearr as nuair a dhéanann muid ár rogha ruda fhéin. Bhí an-bhliain againn agus níor chloígh muid le riail ar bith. Chum muid an cineál stuif a bhí muid ag iarraidh a chumadh agus bhí craic ar leith againn á dhéanamh agus á chasadh ar fud na háite.

Ar éirigh leat déanamh de réir aon rún a bhí agat ag tús na bliana?

Ag tús na bliana, shocraíomar dul go dtí an Astráil cé nach raibh cliú againn an mbeadh muid in ann sin a bhaint amach. Bhí sé class gur éirigh linn sin a dhéanamh. Bheadh mé anseo go hoíche dá ndéarfainn leat an oiread rún nár éirigh linn cloí leo ach beidh muid níos fearr an bhliain seo chugainn!

*Tá dhá Gael Rave fágtha ag Le Boom roimh deireadh na bliana ar an 27 (Oíche) agus 28 (Rave Lae) Nollaig i Dolans Warehouse i Luimneach. Eolas agus ticéid ar www.weareleboom.com