Is é mian TG4 go mbeadh neamhspleáchas bainte amach dá seirbhís nuachta agus cúrsaí reatha faoi Mheán Fómhair 2025 ach tá aighneas idir an craoltóir agus RTÉ le tamall faoin bplean a bhfuil glactha ag an Rialtas leis.
Ní léir d’fhostaithe Nuacht RTÉ/TG4 go bhfuil aon dul chun cinn déanta ag an dá chraoltóir maidir le teacht ar réiteach faoin bplean go mbeadh seirbhís nuachta Gaeilge neamhspleách ag TG4.
Is é mian TG4 go mbeadh neamhspleáchas bainte amach dá seirbhís nuachta agus cúrsaí reatha faoi Mheán Fómhair 2025 ach tá aighneas idir an craoltóir agus RTÉ le tamall faoin bplean ar ghlac an Rialtas deireanach leis.
Ach is ag trácht “ar pháirtnéireacht” idir an dá sheirbhís nuachta teilifíse i nGaeilge a bhí Ceannasaí Nuachta RTÉ, Deirdre McCarthy, nuair a thug sí cuairt ar an seomra nuachta i gceannáras TG4 i mBaile na hAbhann an tseachtain seo caite.
Dúirt roinnt iriseoirí a labhair le Tuairisc faoin gcuairt go bhfeictear dóibh nach bhfuil aon dul chun cinn déanta sna cainteanna idir RTÉ agus TG4 faoi chúrsaí nuachta agus go ndéarfá ón méid a bhí le rá ag an gceannasaí nuachta nach mbeadh aon difríocht ann thairis “an méid atá ag tarlú faoi láthair”. Ag trácht ar pháirtnéireacht seachas neamhspleáchas do nuacht TG4, a bhí Deirdre McCarthy, a dúradh.
Dúradh gur beag sonraí a tugadh don fhoireann faoin gcur chuige páirtnéireachta atá ag teastáil ó RTÉ.
“Ní athróidh tada, shílfeá, agus níl spriocdháta leagtha síos lena aghaidh. Dúradh go raibh go leor dul chun cinn déanta le cúpla mí anuas ach níor tugadh aon eolas breise maidir leis an dul chun cinn sin ná faoi na hathruithe a bheadh ann nuair a bheidh an pháirtnéireacht seo ann,” a dúirt duine amháin.
Mhol an Coimisiún um Thodhchaí na Meán go mbeadh neamhspleáchas eagarthóireachta ag Nuacht TG4 agus ghlac an rialtas deireanach chucu an moladh sin mar pholasaí. An plean a bhí ag TG4 go mbeadh seirbhís nuachta neamhspleách ann roimh dheireadh na bliana seo ach ní dócha go mbainfear an sprioc sin amach.
Amhras caite ag ceannasaí RTÉ ar phlean do sheirbhís nuachta neamhspleách do TG4
Faoi láthair is é RTÉ a chuireann Nuacht TG4 agus 7Lá ar fáil do TG4 agus déantar sin mar chuid den dualgas reachtúil atá ar RTÉ 365 uair an chloig de chláir a chur ar fáil do TG4.
Dúirt iriseoirí ó Nuacht TG4 le Tuairisc go bhfuil “aighneas” ann i gcónaí idir daoine áirithe i TG4 agus daoine áirithe in RTÉ faoi cheist an neamhspleáchais nuachta agus faoi chúrsaí eagarthóireachta.
“Tá siad ag rá go mbeidh smacht éigin eagarthóireachta ag TG4 ach shamhlóinn go gcruthódh sé sin deacrachtaí áirithe idir an dá thaobh den teach. Dá mbeadh TG4 ag iarraidh go gcraolfaí rud éigin agus mura mbeadh RTÉ sásta leis an gcinneadh sin cá bhfios cad a tharlódh,” a dúradh.
Dúirt duine eile go bhfuil “go leor le hoibriú amach” ag lucht bainistíochta TG4 agus RTÉ faoin gceist agus go bhfuil ceisteanna ceardchumainn ann chomh maith le cesiteanna eile faoi chartlann nuachta RTÉ, agus faoin teacht a bheadh ag TG4 ar fhíseáin agus ábhar eile sa chás go scarfaí an nuacht ó RTÉ.
Cé go raibh talamh slán déanta de roimhe seo go raibh glactha ag an rialtas leis an bplean faoi neamhspleáchas nuachta TG4, dúirt Roinn na Meán le Tuairisc i mí an Mhárta go n-aontaíonn an rialtas “i bprionsabal” leis an moladh.
“I dtuarascáil an Choimisiúin um Thodhchaí na Meán, áiríodh moladh go mbeadh smacht eagarthóireachta neamhspleách ag TG4 ar a sheirbhísí nuachta. D’aontaigh an Rialtas i bprionsabal leis an moladh seo, agus é á lua acu, mar sin féin, go raibh gá le tuilleadh plé agus comhairliúcháin maidir le himpleachtaí airgeadais agus praiticiúla an mholta,” a dúradh i ráiteas ó Roinn na Meán.
Chaith Ard-Stiúrthóir RTÉ Kevin Bakhurst amhras roimhe seo ar an bplean seirbhís nuachta neamhspleách a bhunú do TG4.
Dúirt Bakhurst anuraidh nach raibh sruth síoraí iriseoirí oilte Gaeilge ar fáil agus go mbeadh sé an-deacair dhá sheomra nuachta Gaeilge, ceann ag RTÉ agus ceann ag TG4, a líonadh. Dúirt sé go raibh RTÉ tiomanta dá seirbhís nuachta féin a chur ar fáil i nGaeilge ar theilifís, ar Raidió na Gaeltachta agus ar líne agus tuilleadh infheistíochta a dhéanamh inti.
Chuir iarcheannasaí TG4, Alan Esslemont, soiniciúlacht i leith RTÉ anuraidh agus chuir sé an milleán orthu faoin easpa dul chun cinn a bhí á dhéanamh i dtaca leis an bplean neamhspleáchais.
Bhí comharba Esslemont mar ardstiúrthóir TG4, Deirdre Ní Choistín, ina ceannasaí nuachta leis an stáisiún sular ceapadh í ina ceannaire ar TG4 níos luaithe i mbliana. Ba í a bhíodh ag plé le ceist an neamhspleáchais sa ról sin.
Fág freagra ar 'Amhras faoi phlean go scarfaí seirbhís nuachta TG4 ó RTÉ'