Teorainneacha Gaza dúnta i gcónaí, an ghéarchéim dhaonnúil ag dul in olcas

Ag dul in olcas atá an ghéarchéim dhaonnúil in Gaza agus leathmhilliún duine teite óna mbailte i dtuaisceart an cheantair.

Dúirt rialtas Iosrael nárbh fhíor go raibh sos cogaidh i ndeisceart Gaza fógartha acu le go mbeifí ábalta cabhair dhaonnúil a thabhairt isteach agus le go mbeadh deis ag roinnt daoine fágáil.

Tá idirbheartaíocht fós ar siúl maidir le cabhair dhaonnúil a ligean isteach sa cheantar faoi léigear.

Níl aon stad ar na hionsaithe aeir atá á ndéanamh ar Gaza agus tá muintir an cheantair ag rith amach as bia, uisce agus earraí leighis.

Agus trúpaí Iosrael ag bailiú le chéile timpeall ar Gaza agus ag fáil faoi réir d’ionradh talún. Dúirt Uachtarán Stáit Aontaithe Mheiriceá Joe Biden gur “botún mór”  a bheadh ann dá ndéanfadh Iosrael iarracht an ceantar a fhorghabháil an athuair.

Idir an dá linn, deir údaráis mhíleata Iosrael gur 199 duine atá á gcoinneáil ina ngialla in Gaza, níos mó ná an 155 a tuairiscíodh roimhe seo. Fuadaíodh na daoine seo nuair a rinne Hamas ionsaí thar an teorainn ar Iosrael breis is seachtain ó shin, ionsaí inar maraíodh breis is 1,400 duine.

Dúirt aireacht sláinte na Palaistíne inniu gur maraíodh 2,750 duine agus gur gortaíodh 9,700 duine eile in ionsaithe díoltais Iosrael.

Tuairiscítear go raibh na haerionsaithe aréir ar na cinn is measa ó thosaigh an choimhlint deich lá ó shin agus gur maraíodh 450 duine in Gaza sa bhabhta ionsaithe is déanaí sin.

Deir na Náisiúin Aontaithe go bhfuil dian-idirbheartaíocht ar siúl acu ar mhaithe le teacht i gcabhair ar mhuintir Gaza.

Shéan Príomh-Aire Iosrael agus Hamas gur tháinig an dá thaobh ar chomhréiteach faoi shos cogaidh a cheadódh do dhaoine éalú isteach san Éigipt thar bhealach Rafah agus cúnamh daonnúil a thabhairt isteach an bealach céanna.

Tá na mílte cruinnithe gar do Bhealach Rafah agus iad ag súil teitheadh ó Gaza sula gcuirfidh Iosrael tús leis an ionradh talún a shíltear a bheith beartaithe aige go luath.

Is in olcas atá an teannas ag dul chomh maith ar theorainn thuaidh Iosrael leis an Liobáin. Agus é ina imní go bhféadfadh go scaipfeadh an cogadh, d’fhógair Iosrael go raibh roinnt pobal a raibh cónaí orthu laistigh de dhá chiliméadar de theorainn na Liobáine á n-aistriú amach.