Post fógartha ag Cumann Lúthchleas Gael d’oifigeach Gaeilge lánaimseartha den chéad uair riamh

Tá post nua mar oifigeach Forbartha Gaeilge fógartha ag Cumann Lúthchleas Gael an tseachtain seo. D’fhógair iar-uachtarán CLG, Aogán Ó Fearghail mí Feabhra go raibh duine le ceapadh sa ról nua agus tá CLG anois ag glacadh le hiarratais.

Post lánaimseartha atá i gceist agus beidh an té a cheapfar lonnaithe i bPáirc an Chrócaigh. Beidh an t-oifigeach freagrach ar bhonn laethúil do Stiúrthóir Cumarsáide CLG, Alan Mac Maoldúin.

De réir an fhógra, beidh dualgais ar an té a cheapfar clár leathan a chur chun cinn “a fhorbróidh úsáid agus feiceálacht na Gaeilge sa Chumann”.

Beidh an té a cheapfar ina rúnaí ar Choiste Náisiúnta na Gaeilge agus ar Choiste Scór chomh maith.

I measc na spriocanna atá luaite leis an bpost tá CLG ag iarraidh go gcothófaí an Ghaeilge ar ardáin chumarsáide an Chumainn; go gcuirfí béim ar úsáid na Gaeilge ar na meáin shóisialta agus i measc na hóige agus go spreagfaí úsáid na Gaeilge i measc na mball agus na gclubanna ar fud na tíre.

Beidh ardleibhéal Gaeilge, idir scríofa agus labhartha, chomh maith le taithí agus tuiscint ar éiteas CLG, taithí ar fheachtais a bhaineann leis na meáin shóisialta a reáchtáil, i measc na gcáilíochtaí a bheidh riachtanach don phost seo.

Dé hAoine an 4 Bealtaine an spriocdháta le cur isteach ar an bpost.

Ag labhairt dó ar RTÉ Raidió na Gaeltachta níos luaithe i mbliana, tráth a raibh sé fós ina uachtarán, dúirt Aogán Ó Fearghail go mbeidh dualgas ar an té a cheapfar an Ghaeilge a chur chun cinn i measc na gcumann ar fud na tíre agus comhairle agus treoir a chur ar fáil do lucht bainistíochta CLG.

“Tá a lán oifigeach lánaimseartha againn i bPáirc an Chrócaigh ag déileáil leis an iomáint agus leis an bpeil ach go dtí seo ní raibh post lánaimseartha againn don Ghaeilge,” a dúirt Ó Fearghail ag an am.

“Tá an Ghaeilge lárnach i ngach rud a dhéanann muid i gCumann Lúthchleas Gael. Beidh freagracht ar an duine a cheapfar maidir leis na clubanna agus beidh sé in ann comhairle a thabhairt don lucht bainistíochta, don Uachtarán, don Ard-Stiúrthóir agus tacaíocht a thabhairt do na hoifigigh Ghaeilge timpeall na tíre. Sin atáimid ag súil leis.”