Déanfar Ollamh Taca inniu den amhránaí cáiliúil Seosaimhín Ní Bheaglaoich ag ócáid speisialta in Institiúid Teicneolaíochta Bhaile Átha Cliath.
Tá an Ciarraíoch, a bhfuil cáil uirthi i bhfad is i ngearr mar dhuine de mhóramhránaithe tradisiúnta na hÉireann, le ceapadh mar Ollamh Taca le Ceol ag Ardscoil an Cheoil agus na Drámaíochta san Institiúid.
Le deich mbliana anuas, tá an t-amhránaí ó Chorca Dhuibhne ag múineadh amhrán traidisiúnta do mhic léinn na hArdscoile in Institiúid Teicneolaíochta Bhaile Átha Cliath.
Is é ceannasaí na hArdscoile, Gordon Munro, a bhronnfaidh a hOllúnacht ar Ní Bheaglaoich.
Tá an post onórach seo á fháil ag an amhránaí mar aitheantas don obair atá déanta aici ar mhaithe le cur chun cinn na hamhránaíochta tradisiúnta in DIT, áit a mbíonn sí ag múineadh an tsean-nóis.
Údar dóchais atá sa bhronnadh seo, dar le Ní Bheaglaoich, toisc go léiríonn sé go bhfuil athruithe tagtha ar chláir cheoil na n-ollscoileanna agus aitheantas á thabhairt anois don amhránaíocht thraidisiúnta.
“Ní bhíodh ceol ná amhráin thraidisiúnta mar chuid de chéim an cheoil fadó ach tá sin athraithe go mór,” a deir sí.
Beidh dualgais áirithe ar an amhránaí mar Ollamh Taca, dualgais a bhaineann leis an sean-nós a spreagadh i measc na mac léinn.
“Is mór an onóir dom an t-aitheantas seo a fháil. Bainim ana-shult as a bheith ag múineadh na n-amhrán agus ag mealladh daoine óga chun spéis a chur san ealaín seo agus meas a bheith acu air. Agus tá ana-mheas acu air.”
Cuireann Ní Bheaglaoich ina luí ar na mic léinn go bhfuil an sean-nós ar fáil don uile dhuine ar spéis leo é.
“Tá cúpla duine tar éis Corn Uí Riada a bhuachaint agus ní ón nGaeltacht iad. Ní gá go mbeadh Gaeilge ó dhúchas agat chun an sean-nós a fhoghlaim,” a deir sí.
Donncha Ó hÉallaithe
Agus ní ghá gurb í an tsean nós an stíl amhránaíochta atá agat, just mar gheall ar gur ón nGaeltacht thú!