Ní thiocfaidh deireadh fós le haistear diamhair na Gaeltachta

Ceithre bliana déag tar éis dóibh imirt i gcluiche ceannais na Mumhan go deireanach, tá cluiche ceannais cúige sroichte arís ag fir Chorca Dhuibhne agus iad ag imirt tráthnóna i gcluiche ceannais na craoibhe idirmheánaí i dTrá Lí.

Naomh Seanán as Luimneach atá rompu i bPáirc Aibhistín de Staic inniu agus cé gurb iad an Ghaeltacht rogha láidir na coitiantachta, is maith a thuigfidh siad nach féidir leo a bheith réchúiseach faoin gcoimhlint seo.

Thug fir na Gaeltachta taispeántas láidir uathu sa bhabhta leathcheannais, nuair a bhí farasbarr aon phointe dhéag acu ar Mhala, ach i ndiaidh an chluiche sin dúirt bainisteoirí na foirne, Marc Ó Sé agus Conall Ó Cruadhlaoich, go raibh obair fós le déanamh ag na Ciarraígh, go háirithe sa chosaint.

I gcluiche ceannais an chontae, d’éirigh rómhinic leis an Teampall Nua ruathair a dhéanamh trí chosantóirí na Gaeltachta  agus cé nár éirigh le Mala mórán tairbhe a bhaint as an laige sin, ba léir í a bheith ann.

Tá roinnt imreoirí cumasacha ag Naomh Seanán a d’fhéadfadh na bearnaí céanna a aimsiú, go háirithe a gcaptaen Ian Ryan, a imríonn d’fhoireann chontae Luimnigh mar thosaí ach a bhíonn mar leathchúlaí láir dá chlub. Chomh maith le Ryan, tá roinnt imreoirí eile ag Naomh Seanán a bhfuil taithí idirchontae acu: James Naughton, Conor Mullane, Richard Hayes agus tuilleadh nach iad.

Níl ann ach beagán os cionn deich mbliana ó shroich siad cluiche ceannais na sinsear i Luimneach agus cé gur díbríodh iad ón ngrád sin in 2012, bhain siad an cluiche ceannais idirmheánach amach faoi dhó le blianta beaga anuas, sular éirigh leo ardú céime a fháil i mbliana.

É sin ráite, is cinnte go bhfuil an cumas ag imreoirí na Gaeltachta cluiche an lae inniu a bhuachan. Pé deacrachtaí a bhí acu i measc na gcosantóirí le cúpla cluiche anuas, bhí a gcuid tosaithe ar fheabhas in aghaidh Mhala agus d’aimsigh an seisear a thosaigh scóranna sa bhua sin.

D’aimsigh na fir lár páirce, Roibeard Ó Sé agus Seán Ó Gairbhí, cúilíní in aghaidh Mhala chomh maith agus bíonn tionchar mór acu beirt anois ar imirt na Gaeltachta, go háirithe Ó Gairbhí, a raibh mí-ádh ceart air le gortuithe le bliain nó dhó anuas.

Má bhíonn an bheirt sin i mbarr a maitheasa, is iontach an misneach a thabharfaidh siad don Ghaeltacht.

Ba chóir go mbeidís ag ceiliúradh arís tráthnóna agus tá cuid eile dá n-aistear diamhair le cur díobh acu fós.

Tá foireann Ghaeltachta eile ag dul chun páirce i gcluiche mór tráthnóna chomh maith agus an Rinn agus Gleann na hUidhre ag tabhairt aghaidh ar a chéile i gcluiche leathcheannais Chraobh Shinsir Peile Phort Láirge.

Níl aon chluiche imeartha ag fir na Rinne sa chomórtas ó dheireadh mhí Iúil ach, ar a laghad, bhí a gcuid imreoirí gafa le Craobh Idirmheánach Iomána an chontae, craobh a bhuaigh siad.

Ní raibh aon easpa cluichí ar Ghleann an hUidhre mar tá trí chluiche craoibhe imeartha acu le coicís.

Bhain siad áit amach sa bhabhta leathcheannais a bhuíochas de bhua bog go maith ar an Chlais Mhór/Cionn tSáile Dé Máirt seo caite. D’aimsigh iománaí na nDéise, Conor Gleeson seacht bpointe dóibh sa chluiche sin agus is cinnte go bhfuil Gleeson ar dhuine de na himreoirí a gcaithfidh an Rinn súil ghéar a choinneáil air.

Is iad Gleann na hUidhre a bhuaigh Craobh Phort Láirge anuraidh ach tá deis ag an Rinn cluiche ceannais na craoibhe a bhaint amach den chéad uair ó 1925. Tá neart imreoirí ag an Rinn ar fhoireann an chontae anois agus tá a gcumas léirithe acu i gComórtas Peile na Gaeltachta le roinnt blianta anuas.

Is cinnte go dtabharfaidh Gleann na hUidhre cluiche crua dóibh ach má éiríonn le Donie Breathnach, Ray Ó Ceallaigh, Fearghal Ó Cuirrín agus a leithéidí dul i bhfeidhm ar an gcluiche, beidh seans acu.

Cluiche Leathcheannais Chraobh Shinsir Peile Phort Láirge

Gleann na hUidhre v An Rinn, Páirc Uí Fhearchair, 1.30i.n.

Cluiche Ceannais Chraobh Idirmheánach Peile na Mumhan

An Ghaeltacht v Naomh Seanán, Páirc Aibhistín de Staic, 2.00i.n.