Naomh Abán sa tóir ar áit i gcluiche ceannais na hÉireann tar éis turas fada

Ar an mbóthar luath ar maidin a bheidh muintir Naomh Abán agus turas fada rompu chuig contae an Chabháin do chluiche leathcheannais na hÉireann. Ag tabhairt aghaidh ar churaidh Uladh, Cnoca Bríde, a bheidh mná Mhúscraí agus áit i gcluiche ceannais Chraobh Idirmheánach na hÉireann ar fáil don bhuaiteoir.

Tá taithí ag cuid mhaith d’imreoirí Naomh Abán ar lá mór ar nós an chinn seo. Chuaigh siad chomh fada le cluiche ceannais Chraobh Shóisir na hÉireann in 2022 agus cé go bhfuair Bóthar na Trá-Cnoc na Cathrach an ceann is fearr orthu an lá sin, beidh súil ag na Corcaígh go mbainfear tairbhe as na ceachtanna a foghlaimíodh le linn an aistir sin.

Cinnte tá a gcumas léirithe cheana féin ag mná na Gaeltachta chun an chuid seo den chraobh a bhaint amach. Thugadar leo craobh Chorcaí an mhí seo caite tar éis dóibh bua cuimsitheach a fháil ar Mhainistir na Corann, 2-11 in aghaidh 1-6, ach tugadh dúshlán ceart dóibh i gcluiche ceannais na Mumhan in aghaidh Chluain Mhic Cuinn-Maigh Mheáin. Bhí Naomh Abán sé phointe chun tosaigh agus deich nóiméad fágtha ach d’aimsigh na Ciarraígh dhá chúl as a chéile chun an choimhlint a thabhairt go dtí am breise. D’fhéadfadh tubaiste mar sin deireadh a chur le go leor foirne ach tháinig Naomh Abán chucu féin san am breise agus thugadar an lá leo le bua trí phointe, 2-11 in aghaidh 2-8.

D’aimsigh Róisín Ní Liatháin 1-6 i gcluiche ceannais an chúige, duine den ghrúpa tosaithe cumasacha atá ag Naomh Abán. Tá gaiscí scórála déanta ag Lydia Nic Dhonnacha i gcaitheamh na craoibhe – 1-9 a fuair sí i gcluiche ceannais an chontae – agus cumas maith ag leithéidí Annie Ní Mheachair agus Grace Ní Mhurchú, a thug léi gradam LGFA d’imreoir na míosa do mhí Dheireadh Fómhair. Tá Amy Nic Dhonnacha agus Gráinne Ní Luasa láidir i lár na páirce freisin agus is í Rosie Ní Chorcora crann taca na cosanta mar leathchúlaí láir.

Tá cuma an-láidir ar an bhfreasúra inniu áfach agus slad déanta ag Cnoca Bríde ar fhoirne chun an cluiche seo a bhaint amach. Bua cúig phointe dhéag a bhí acu ar Loch Gamhna i gcluiche ceannais an Chabháin agus farasbarr trí phointe dhéag a bhí acu ar chumann Bhrigid Uí Néill ó Mhuineachán i gcluiche ceannais Uladh. Mar a tharlaíonn sé, cumann Gaeltachta eile, Gaeil Fhánada Dhún na nGall, a thug an dúshlán ba mhó do Chnoca Bríde go dtí seo ach bua 1-8 in aghaidh 0-4 a bhí ag mná an Chabháin i mbabhtaí ceathrú ceannais an chúige.

Bhí an cúl báire Katie Mulvey agus an leatosach láidir Sara McCabe ag imirt le foireann an chontae i mbliana agus bhí an-fheachtas go dtí seo ag leithéidí Katie Mai Reilly agus Sinead O’Reilly sa gcosaint agus tá Abbi Connor ar dhuine acu siúd a gcaithfidh Naomh Abán súil a choinneáil orthu sna tosaithe.