Dá n-abraíodh duine “níl ann ach bacach” bheadh a fhios agat gur ceapadh gur duine tútach, suarach a bheadh ann.
Is ionann duine bacach agus duine a bhfuil éalang nó anó ar a chois. Tá bacaíl i gcois leis a déarfaí. Tá tarraingt bhacaíola ann.
Dá rachadh tairne i mbeo capaill dhéanfadh sé bacach í.
Bacach a thugtaí ar fhear siúil, ar shreothaí, ar ridire bóthair.
Tá a fhios ag bacach an bhóthair é sin a déarfaí faoi eolas a bheadh ag cách.
Bacach a thugadh muintir Eanach Dhúin ar an mbradán fireann.
Scéal bacach a thabharfaí ar scéal leamh agus leithscéal bacach ar leithscéal gan dealramh.
Bhí cluiche ann a dtugtaí an bacach buí air. Chuirtí slat mhara ina seasamh agus bhítí ag caitheamh slata mara léi ag iarraidh í a bhualadh.
Tá amhrán ann dar teideal ‘Bacach Buí na Léige’.
Fág freagra ar 'NACH GRÁNNA É? Níl ann ach bacach…'