Na leabhair Ghaeilge atá ainmnithe do Ghradaim Leabhar na Bliana An Post fógartha

Fógraíodh aréir na leabhair Ghaeilge atá ainmnithe do Ghradaim Leabhar na Bliana An Post.

Tá ceithre leabhar ficsin Gaeilge san iomaíocht don Ghradam Love Leabhar Gaeilge i mbliana agus, den chéad uair ó bunaíodh na gradaim 20 bliain eile, tá áit bainte amach ag leabhar Gaeilge i measc leabhar Béarla ar ghearrliosta eile seachas an ceann Gaeilge.

Tá An Fia sa Choill le Sadhbh Devlin, a mhaisigh Anastasia Melynkova agus a d’fhoilsigh Futa Fata, ainmnithe ar an ngearrliosta don ghradam do leabhar páistí na bliana.

Ceithre leabhar ficsin atá ainmnithe don ghradam do leabhar Gaeilge na bliana, atá á riar ag Lorg Media le hurraíocht ó Fhoras na Gaeilge. Is iad na leabhair sin, An Bhlaosc sa mBois le Micheál Ó Conghaile, a d’fhoilsigh Cló Iar-Chonnacht, Fiche le Colm Ó Ceallacháin, a d’fhoilsigh Leabhar Breac, Scéalta Nollag le Alan Titley, a d’fhoilsigh Leabhair COMHAR agus ‘Bódléar’ le Darach Ó Scolaí, a d’fhoilsigh Leabhar Breac.

Chuir Seán Ó Coinn, Príomhfheidhmeannach Fhoras na Gaeilge, fáilte mhór roimh fhógairt na ngearrliostaí.

“Ní hamháin go bhfuil saothair ar ardchaighdeán á scríobh agus á léamh i nGaeilge ar ghearrliosta Love Leabhar Gaeilge, tá leabhar Gaeilge den scoth anois ainmnithe ar ghearrliosta a bhí luaite go stairiúil le leabhair Bhéarla amháin.

“Táimid ag súil go mór go mbeidh pobal na Gaeilge an-ghníomhach sa phróiseas vótála do na catagóirí agus go mbeidh an Ghaeilge i lár an aonaigh nuair a bhronnfar na gradaim arís i mbliana,” a dúirt sé.

Dúirt Tadhg Mac Dhonnagáin, úinéir Futa Fata, a d’fhoilsigh An Fia sa Choill le Sadhbh Devlin go raibh “íiméad” air faoin bhfógra.

“Aitheantas é ar an gcaighdeán ard oibre atá bainte amach ag Sadhbh Devlin le blianta mar scríbhneoir don óige agus ar an stíl ar leith maisiúchán a thug Anastasia Melnykova léi óna tír dhúchais, an Úcráin, stíl a chuir go mór leis an leagan nua seo de sheanscéal ón traidisiún Gaelach.”

Fógraíodh gearrliostaí Ghradaim An Post 2025 ag ócáid speisialta in Ard-Oifig an Phoist i mBaile Átha Cliath aréir. Fógrófar na buaiteoirí ag ócáid a bheidh ar siúl in Ionad na Comhdhála i mBaile Átha Cliath ar an 27 Samhain 2025.