‘Liam’ agus ‘Aoife’ fós ar na hainmneacha Gaeilge is coitianta ar leanaí, ach ‘Fiadh’, ‘Ciara’ agus ‘Rónán’ ag dul sa treis

Ba iad ‘Liam’ agus ‘Aoife’ na hainmneacha Gaeilge is coitianta a tugadh ar leanaí na hÉireann i 2015.

Tá bliain eile imithe tharainn agus tá a gcuid staitisticí don bhliain 2015 eisithe ag lucht na bpasanna ar Shráid Theach Laighean. Arís eile i mbliana, is iad Aoife agus Liam an dá ainm Gaeilge is coitianta a thugtar ar leanaí na hÉireann, de réir staitisticí na Roinne Gnóthaí Eachtracha.

D’eisigh Oifig na bPasanna, rannóg de chuid na Roinne, liosta na n-ainmeacha is coitianta ar phasanna a tugadh do shaoránaigh faoi bhun trí bliana d’aois i 2015 an tseachtain seo.

Ní raibh ach ainm Gaeilge amháin i measc na ndeich n-ainm is coitianta ar bhuachaillí anuraidh ach tá an deichiú háit sciobtha leis anois ag ‘Cillian’, a bhí ag uimhir 24 ar liosta 2014. Is ag uimhir a sé atá ‘Liam’ i mbliana.

Níor éirigh le haon ainm Gaeilge áit a bhaint amach i measc na ndeich n-ainm is mó tóir do chailíní i 2015, cé gur ag uimhir a sé a bhí ‘Aoife’ an bhliain seo caite. Tá an t-ainm sin tite go huimhir 11 ar an mórliosta anois.

Liosta na ndeich n-ainm Gaeilge is coitianta do bhuachaillí agus do chailíní faoi bhun trí bliana d’aois i 2015

Bhí 200 ainm ar an mórliosta a chuir Oifig na bPasanna amach agus ba iad ‘Daniel’, ainm Eabhraise, agus ‘Emily’, ainm Laidine, a bhí ar bharr an liosta sin. San iomlán, bhí 18 ainm Gaeilge do bhuachaillí agus 14 ainm Gaeilge do chailíní ar an mórliosta 200 ainm.

Is beag an t-athrú atá tagtha ar liosta na n-ainmneacha Gaeilge in imeacht bliana agus tá na hainmneacha céanna nach mór le feiceáil ar liosta 2015 is a bhí le feiceáil ar liosta 2014, cé go bhfuil ord difriúil orthu in áiteacha. Tá ‘Eoghan’ imithe ón liosta ó bhí 2014 ann ach tá ‘Rónán’, nach raibh ar liosta na bliana seo caite, anois ar an deichiú hainm Gaeilge is coitianta ar bhuachaillí.

Tá ‘Sadhbh’ agus ‘Aoibheann’ imithe ó liosta na gcailíní ó anuraidh ach tá ‘Fiadh’ agus ‘Ciara’ anois tagtha ina n-áit. Arís eile tá ‘Saoirse’ sa dara háit ach tá an t-ainm sin – atá go mór i mbéal an phobail faoi láthair mar gheall ar an aisteoir Saoirse Ronan – tite ó uimhir 18 go 21 ar mhórliosta na gcailíní.

Tá leaganacha Béarla d’ainmneacha Gaeilge ar an liosta freisin – Clodagh, Maeve agus Conor, cuir i gcás – nár cuireadh san áireamh agus anailís á déanamh ag Tuairisc.ie.

Mheabhraigh Oifig na bPasanna do mhuintir na hÉireann bailíocht a bpas a sheiceáil agus cur isteach ar cheann nua roimh ruathar an tsamhraidh.