Dán do Raidió na Gaeltachta le Joe Steve Ó Neachtain

Fiche bliain ó shin agus Raidió na Gaeltachta 30 bliain d’aois, chum fathach na Cré Duibhe Joe Steve Ó Neachtain (1942 – 2020) dán don ócáid. Tá áthas orainn an dán a fhoilsiú inniu agus RnaG ag ceiliúradh an leathchéid

Dán do Raidió na Gaeltachta le Joe Steve Ó Neachtain

‘Ba nuacht do ghlór go seasta…’

 

Ba páiste glórach thú ón tús

a labhair i gcaint na ndaoine,

páiste a dhiúl an briathar beo

ón máthair a thug don tsaol thú.

Níorbh iontas sin, mar ba bród do ghin,

is ba misneach cláir do chliabháin.

Ní bheifeá beo marach léirsiú is gleo

ó dhream nach ndearna aon díobháil.

Labhair tú amuigh, is labhair tú istigh,

ba nuacht do ghlór go seasta.

          Labhair tú ar cheol ar spraoi is ar spóirt

Labhair tú ó Dhún na nGall go Casla.

Tá tú anois deich mbliana os cionn an scóir,

bród inár nglór ag caint ort,

bród as glór a d’fhás ón bhfód

nárbh ionann agus glór an strainséir.

Fág freagra ar 'Dán do Raidió na Gaeltachta le Joe Steve Ó Neachtain'

  • Pilib Ó Duinn

    Suí síos anois agus éist le mo scéal
    Is féidir leat é a aithris ó bhéal go béal
    Ba mhian liom labhairt faoin ‘stáisiún’
    Agus é á sheoladh fud fad an náisiúin
    Ar siúil ar an aer maidin go hoíche
    Le cúnamh Dé ní stopfaidh sé choíche
    Beagnach gach chlár á chraoladh beo
    Tá súil agam iad a bheith ann go deo

    Go moch ar maidin caithfimid dul siar
    Le bheith ag éisteacht ar chlár Iris Aniar
    Más ar dhíospóireacht atá tú ag brath
    Éist le Athmhaidin agus glór Ghormfhlaith
    Idir aon déag is meánlae bíonn réalta
    Le Gaeilg Uladh ar sheó Barrscéalta
    Ag Michelle Nic Grianna a bhíonn an cleas
    Le achan fadúda a fhoghrú go deas

    An Saol ó Dheas curtha i láthair ag Helen Ní Shé
    Scéalta faoin Ríocht, caid, gandal is gé
    Cluas a thabhairt d’Fhachtna ar Tús Áite
    Nach iad na polaiteoirí a bhíonn cráite
    Ó hEibhlín de Bhailís a thagann an Nuacht
    Lena guth a chloisint, sheasfainn sa bhfuacht

    An Gealach Gorm le haghaidh an cheoil
    Rac, traidisiúnta, reggae, sciobóil
    Ná foinn is amhráin idir shean is nua
    Ó Shliabh Luachra go Sliabh gCua
    Agus Jo Ní Chéide lena binn ghuth
    An Taobh Tuathail ann ina shruth
    Pádraig agus Toose ar Eachtraigh Dom
    An mbíonn siad ag insint an fhírinne lom?

    Liam Mac an Iomaire agus Leagan Cainte
    Lena haíonna bíonn na seoda roinnte
    Caoga bliain anois ar an bhfód
    Cheapfá é bheith ann le hanallód
    Saibhreas na Ghaeilge le cloisteáil
    Blasanna canúintí anonn is anall
    An áit a cloiseann tú na réaltacha
    Leoga, sin é Raidió na Gaeltachta