Síneadh curtha leis an spriocdháta do Chomórtais Liteartha an Oireachtais

Tá síneadh ama curtha ag Oireachtas na Gaeilge leis an spriocdháta d’iontrálacha do Chomórtais Liteartha Oireachtas na Samhna.

Beidh deis anois ag scríbhneoirí na Gaeilge a saothar a chur faoi bhráid mholtóirí an Oireachtais go dtí an 8 Iúil 2025.

Táthar ag lorg úrscéalta, gearrscéalta, ficsean d’fhoghlaimeoirí fásta, saothar próis, filíocht, ailt iriseoireachta, greannáin, drámaíocht agus saothar eile nach iad do chomórtas na bliana seo.

Tá duaischiste €30,000 le bronnadh ag an Oireachtas sna comórtais uile. Bronnfar €3,000 ar an duine a bhuafaidh rannóg na n-úrscéalta; €2,000 an duine ar bhuaiteoirí sna rannóga ficsin do dhaoine óga agus don fhoghlaimeoir fásta. Tá duaiseanna móra ann don fhilíocht freisin agus €1,250 ann don duine a scríobhfaidh an cnuasach filíochta is fearr i mbliana.

Ar na comórtais atá ar chlár na féile seo tá aiste faoi ‘Chur chun cinn na Gaeilge’, ‘Gearrscéal’, ‘Scéal dírithe ar dhéagóirí’, agus ‘Saothar Spioradálachta/Creidimh/Ábhar Marana’.

Tá catagóirí eile ann don drámaíocht agus don fhilíocht. Bronnfar duais ar leith ar an dán is fearr agus duais eile ar an gcnuasach filíochta is fearr. Ó thaobh na drámaíochta de, tá cúig chatagóir ann i mbliana – ‘Dráma raidió’, ‘Dráma Aonghnímh’, agus trí chatagóir don drámaíocht atá dírithe ar pháistí.

Bronnfar Duais Chuimhneacháin Aoidh Uí Ruairc ar an dráma is fearr do pháistí ó na naíonáin mhóra go rang a trí; bronnfar Duais Chuimhneacháin Carmel Uí Bholguidhir ar an dráma is fearr do páistí ó rang a ceathair go rang a sé; agus bronnfar Duais Chuimhneacháin Dhonncha Uí Shúilleabháin ar an dráma is fearr do dhaltaí meánscoile.

Tá dhá rannóg iriseoireachta ann arís i mbliana: iriseoireacht, agus iriseoireacht do dhaoine faoi 30. Is é an t-irisleabhar Nós atá ag déanamh urraíochta ar an gcomórtas do dhaoine faoi bhun tríocha bliain d’aois agus foilseofar an t-alt a bhuafaidh ar an iris i ndiaidh an chomórtais. Tá duais €500 an ceann luaite leis an dá chomórtas iriseoireachta agus duaiseanna €300 agus €200 do na daoine a thiocfaidh sa dara agus sa tríú háit sa chomórtas do dhaoine fásta.

Tá síneadh ama curtha freisin leis an spriocdháta do na comórtais do dhaoine atá fós sa chóras oideachais freisin. Tá ceithre chatagóir ann sa chomórtas greannán do dhaltaí bunscoile: ceann do dhaltaí i rang a trí, ceann do dhaltaí i rang a ceathair, ceann do dhaltaí i rang a cúig, agus ceann do dhaltaí i rang a sé.

Is do dhaltaí Gaelscoile agus scoileanna Gaeltachta iad na comórtais sin. Ní mór do na hiarrthóirí greannán a scríobh i nGaeilge a bheidh bunaithe ar na leideanna atá tugtha ar shuíomh an Oireachtais, agus léaráidí dá ndearadh féin fite fuaite tríd an scéal. Glacfar le hiarratais aonair agus le comhiarratais ó bheirt (scríbhneoir agus ealaíontóir, mar shampla).

Tá comórtais ann do script ghearrscannáin, greannán do lucht na Sraithe Sóisearaí agus do lucht na hArdteiste; ceann don phrós; ceann don iriseoireacht; ceann don fhicsean; agus ceann don fhilíocht. Ní dhéantar idirdhealú idir na haoisghrúpa sna ceithre chatagóir dheireanacha sin.

Ar deireadh, tá ceithre chomórtas ann do lucht an tríú leibhéal i mbliana: prós, iriseoireacht, ficsean, agus filíocht.