Tá Cornadh na Gaeilge “ag súil le tinreamh maith” ag Ard-Fheis na heagraíochta i mbliana cé gur ar Lá an Olltoghcháin a bheidh na toscairí ag teacht le chéile i gCaisleán Bhaile Átha Cliath.
D’fhógair an Taoiseach Enda Kenny inné gur Dé hAoine an 26 Feabhra a reáchtálfar an t-olltoghchán i mbliana. Bhí fógartha ag Conradh na Gaeilge i bhfad siar gur ar an deireadh seachtaine sin a bheadh Ard-Fheis 2016 ar siúl san Ardchathair.
Dúirt Julian de Spáinn, Ard-Rúnaí an Chonartha, le Tuairsic.ie go raibh an eagraíocht ag súil le tinreamh maith ag an Ard-Fheis agus na himeachtaí eile ar an deireadh seachtaine in ainneoin an olltoghcháin.
Cuirfear tús le hArd-Fheis an Chonartha i gCaisleán Bhaile Átha Cliath Dé hAoine ag a 7 a chlog, trí uair a chloig sula ndúnfar na hionaid vótála. Beidh imeachtaí na hArd-Fheise ag dul ar aghaidh an lá ina dhiaidh sin freisin a fhad is a bheidh na vótaí á gcomhaireamh.
Is é an tUachtarán Michael D. Higgins a osclóidh an Ard-Fheis agus beidh an chéad seimineár eile sa tsraith atá eagraithe ag an gConradh do Chomóradh an Chéid 1916 ar siúl díreach i ndiaidh óráid an Uachtaráin.
Is iad Peadar Kirby, ollamh emeritus le an bpolaitíocht idirnáisiúnta in Ollscoil Luimnigh; Regina Uí Chollatáin, ó Scoil na gCéimithe in UCD; Colm Ó Néill, Oifigeach Gaeilge AMLÉ; agus Cóilín Ó Cearbhaill, uachtarán an Chonartha a bheidh i mbun díospóireachta ar an ábhar ‘Conradh na Gaeilge agus Saoirse Intinne’.
Pléifear le gnáthimeachtaí na hArd-Fheise: rúin na gcraobhacha, tuairsicí na n-eagras atá faoi scáth an Chonartha, agus toghcháin an Chonartha Dé Sathairn sula dtabharfaidh Ó Cearbhaill óráid an Uachtaráin uaidh.
Tá imeachtaí eile eagraithe do lucht freastail na hArd-Fheise i ndiaidh na ngnóthaí oifigiúla freisin, turais stairiúla agus imeachtaí do theaghlaigh ar fud na cathrach.
Fág freagra ar 'Conradh ag súil le ‘tinreamh maith’ ag Ard-Fheis 2016 in ainneoin an Olltoghcháin'