‘Cheap mé gur parthas a bhí i gConamara, ach botún ab ea bogadh ann’ – clár nua faoi Noel Hill le craoladh anocht

Craolfar anocht ar TG4 den chéad uair clár faisnéise faoi shaol agus faoi shaothar an cheoltóra mór le rá Noel Hill agus faoin drochionsaí a rinneadh air a d’fhág gortaithe go dona é ina chorp agus ina intinn.

Deir Hill sa chlár, Noel Hill – Aisling Ghéar go mbraitheann sé doicheall roimhe i nGaeltacht Chonamara mar gheall ar an ionsaí a rinneadh air.

Deir Hill nach aon “paranoia” atá air ach go bhfuil olc ar dhaoine leis agus an dearcadh acu gurb é ba chúis le duine “dá gcuid féin” a bheith i bpríosún.

In 2015, gearradh téarma priosúin seacht mbliana ar thógálaí ó Chonamara Michael Folan as Leitir Mealláin, as ionsaí tromchúiseach a dhéanamh ar an gceoltóir tradisiúnta i leithreas i dteach tábhairne ar oíche Lá ‘le Stiofáin 2008.

D’fhág an t-ionsaí go mbeadh na gortuithe ag cur as do Hill ar feadh a shaoil.

Agus an phianbhreith á fhógairt ag an mBreitheamh Rory McCabe i gCúirt Chuarda Choiriúil na Gaillimhe, dúirt sé gur ionsaí “uafásach, gránna agus brúidiúil” a bhí ann agus go mba uafásach an méid a bhí fulaingthe ag an íobartach dá bharr.

Tá moladh faighte cheana féin ag an scannán faisnéise nua, a stiúir Paddy Hayes. Dúradh i léirmheas a foilsíodh sa Journal of Music in Ireland go raibh “an-chreidiúint go deo” ag dul do lucht déanta an scannáin as an tslí ar láimhseáil siad  “ábhar íogair” an scéil agus as scannán “iontach” a chur ar fáil.

Dúradh chomh maith go raibh ábhar duairc sa scannán a ardaíonn “ceisteanna crua” faoi phobal, ceart agus féiniúlacht.

• Beidh Noel Hill – Aisling Ghéar le Magamedia Productions ar TG4 anocht ag 9.30pm