Ceardlanna, ceolchoirmeacha agus cibeal go leor ag Tionól Nioclás Tóibín sa Rinn

Ní beidh aon easpa ceoil ar Mhuimhnigh an deireadh seachtaine agus Tionól Nioclás Tóibín ar siúl sa Rinn agus Éigse na Brídeoige in Uíbh Ráthach.

Tá Nioclás Tóibín agus a mhuintir aitheanta ar mhórfhonnadóirí na hÉireann agus is mór a thionchar ar amhránaithe agus amhránaíocht na nDéise sa lá atá inniu ann.

Ag Tionól Nioclás Tóibín sa Rinn agus sa Sean-Phobal ó inniu go Domhnach beidh ceardlanna, ceolchoirmeacha agus cibeal go leor ina ainm.

Anocht beidh Noel Hill, Liam O’Connor, Caoimhín Ó Fearghaíl, Sláine Ní Chathalláin agus Saileog Ní Cheannabháin i lár stáitse i Halla Pobail na Rinne, agus na doirse ag oscailt ag 7pm. Bronnfar Gradam Nioclás Tóibín 2023 ag an gceolchoirm.

Maidin amárach, Dé Sathairn ag a 10.00am a thosófar ar na ceardlanna sa Mheánscoil agus scoth na gceoltóirí ina mbun.

Tabharfaidh Éamonn Ó Bróithe, a raibh aithne aige ar Nioclás, léacht an Tionóil ar 2pm Dé Sathairn i gColáiste na Rinne agus ina dhiaidh seolfaidh Pax Ó Faoláin suíomh idirlín nua ar cheol John Dwyer atá curtha le chéile aige.

Beidh na teagascóirí ar stáitse i Halla Pobail na Rinne san oíche Dé Sathairn, agus ina dteannta beidh amhránaithe breátha an cheantair.

Leanfar le ceardlanna ar an Domhnach chomh maith agus seolfar albaim nua i dTigh an Cheoil ar 2pm le Derek Hickey agus Diarmuid Ó Meachair.

Le críoch a chur le himeachtaí an Tionóil ar an Luan, beidh ceadal i Halla Cholmáin sa Sean-Phobal ag a 1pm le The Kane Sisters agus Danny agus Eoiní Maidhcí Ó Súilleabháin. Críochnóidh an Tionól le seisiún ina dhiaidh i dTigh Uí Mhaonaigh sa Rinn ar 15:30pm. Gach eolas le fáil anseo.