Cuirfear seasca áit ar leataobh do chainteoirí líofa Gaeilge mar chuid d’fheachtas earcaíochta an Gharda Síochána a fógraíodh inniu. D’fhógair an tAire Dlí agus Cirt Frances Fitzgerald go n-earcófar 600 garda nua sa bhliain 2016.
De réir an tsocraithe a rinne an tIar-Choimisinéir Teanga Seán Ó Cuirreáin leis an nGarda Síochána, caithfidh 10% de Ghardaí nua a bheith ina gcainteoirí líofa Gaeilge. Cuireadh an socrú i bhfeidhm nuair a tháinig sé chun solais nach raibh Gaeilge ag ochtar de naonúr Gardaí a bhí lonnaithe i nGaeltacht Ghaoth Dobhair.
Sarú a bhí sa méid sin ar Acht an Gharda Síochána 2005. Éilíonn an tAcht sin go mbeadh líofacht sa Ghaeilge ag Gardaí a mbeadh plé acu le daoine sa Ghaeltacht.
Osclaíodh Coláiste an Gharda Síochána an athuair i mí Mheán Fómhair na bliana 2014. Nuair a bheidh an 600 iarrthóir nua seo roghnaithe, beidh 1,150 duine earcaithe ó osclaíodh an athuair an Coláiste. Den 1,150 duine sin táthar tar éis 295 duine a fhianú mar Ghardaí agus iad ag obair i stáisiúin ar fud na tíre.
Tá iarrtha ag an Aire Fitzgerald ar bhaill de phobail mhionlaigh cur isteach ar na poist a fógraíodh inniu chun go mbeidh An Garda Síochána ‘ionadaíoch ar an bpobal a fhreastalaíonn sé air’.
Fearn
Is dóigh go bhfágfadh sin 90% de Ghardaí gan Gaeilge.
Cluiche nua coiriúlachta: Aimsigh an garda as deichniúr a bhfuil an cúpla focal aige : “Tá tú gaibhte, a raimsce2 :-)