‘Tá an baol ann nach nglacfaidh tuismitheoirí leis an bplean seo’ – imní léirithe faoi shocrú CBS Sráid Synge

Dúradh sa Seanad an tseachtain seo go bhfuil seans ann nach mbeidh aon ghlacadh ag tuismitheoirí a bhí ag feachtasaíocht ar son Gaelcholáiste nua i ndeisceart chathair Bhaile Átha Cliath le plean gaelcholáiste a dhéanamh de scoil Bhéarla sa cheantar.

D’fhógair an Roinn Oideachais go bhfuil iar-bhunscoil chomhoideachais lán-Ghaeilge le déanamh de CBS Sráid Synge, iarbhunscoil do bhuachaillí i ndeisceart na cathrach, ach ó léirigh bord bainistíochta, múinteoirí agus tuismitheoirí na scoile amhras faoin bplean, tá sé i gceist tabhairt faoin athrú ar bhonn céimnithe.

Faoin gcur chuige nua, glacfar le daltaí an bhliain seo chugainn a bheidh ag fáil a gcuid oideachais trí mheán na Gaeilge, ach glacfar chomh maith le daltaí eile a gheobhadh oideachas trí Bhéarla go dtí go gcríochnóidh siad a gcuid scolaíochta in 2032.

Tugadh foláireamh sa Seanad inné go mb’fhéidir nach mbeidh aon ghlacadh leis an bplean sin ag lucht tacaíochta an fheachtais BÁC 2, 4, 6, 8 atá ag éileamh Gaelcholáiste nua sa gceantar le cuid mhaith blianta.

An Seanadóir Evanne Ní Chuilinn an polaiteoir is déanaí a léirigh amhras faoin bplean agus é ráite aici go bhfuil imní ar dhaoine nach bhfaighidh daltaí an Ghaelcholáiste tumoideachas ceart má bhíonn siad lonnaithe ar an suíomh céanna ina bhfuil daltaí á dteagasc trí Bhéarla.

“Tá sé tábhachtach a rá go soiléir nach raibh aon duine a bhain le feachtas an Ghaelcholáiste ag iarraidh múnla hibrideach [an dá theanga] den oideachas ar champas nach Gaeilge amháin a bheidh á labhairt ann,” a dúirt Ní Chuilinn

Dúirt sí go bhfuil an seans ann nach gcláróidh na teaghlaigh a bhí gníomhach sa bhfeachtas ó bunaíodh é a bpáistí le CBS Sráid Synge an bhliain seo chugainn.

Dúirt Ní Chuilinn, Seanadóir nua de chuid Fhine Gael, gur chuir sí fáilte roimh an scéal go raibh Gaelcholáiste nua le bunú i ndeisceart na cathrach. Dúirt sí go mbíonn ar a mac féin dhá bhus a fháil chun “taisteal trasna na cathrach” chun freastal ar scoil lán-Ghaeilge.

Mar sin féin, dúirt Ní Chuilinn go raibh roinnt mhaith ceisteanna ann faoin bplean scoil Bhéarla a athrú ina scoil lán-Ghaeilge.

Tá na daltaí a chláróidh don oideachas lán-Ghaeilge an bhliain seo chugainn le lonnú i bhfoirgneamh ar leith sa scoil ach dúirt an Seanadóir go raibh tuilleadh eolais ag teastáil maidir le céard a bheadh i gceist leis an bplean sin.

Tá leas-phríomhoide nua le ceapadh sa scoil chun ceannas a ghlacadh ar fhorbairt an Ghaelcholáiste ach d’fhiafraigh Ní Chuilinn an gceapfaí bord nó coiste nua chomh maith ar a mbeadh daoine le saineolas faoi chúrsaí Gaeloideachais.

Dúirt Michael Moynihan, Aire Stáit sa Roinn Oideachais, go mbeadh sé i dteagmháil leis an Seanadóir Ní Chuilinn maidir leis na ceisteanna a chuir sí agus maidir le héileamh eile a rinne sí, is é sin go mbeadh cruinniú idir lucht an fheachtais BÁC 2, 4, 6, 8 agus an Roinn.

Dúirt Moynihan gur athrú mór a bhí i gceist agus go mbeadh “treoir shoiléir” ag teastáil don scoil agus do na múinteoirí inti.

“Tá an chumarsáid ríthábhachtach sa bhforbairt mhór seo do CBS Sráid Synge. Is cuid de stair na tíre an scoil. Tá sé tábhachtach go ndéanfar é seo i gceart,” a dúirt an tAire Stáit.