Páistín as Éirinn an páistín deireanach a bheannaigh an Pápa Proinsias an uair dheiridh gur tháinig sé os comhair an phobail roimh bhás dó.
Agus é ar a chamchuairt dheireanach ar Chearnóg Naomh Peadar Dé Domhnaigh seo caite, thug an Pápa a bheannacht do John Flynn, leanbh trí mhí d’aois as Ráth Caola in iarthar Luimnigh.
Ceathrar páistíní agus beirt pháistí níos sine a bheannaigh an Pápa le linn a chamchuairt gan choinne timpeall na cearnóige i gcarr an phápa, nó an popemobile, Domhnach Cásca.
Bhí John Flynn ar an bpáistín beag deireanach a bheannaigh an Pápa Proinsias sular fhill sé ar an Casa Santa Marta, áit a bhfuair sé bás an mhaidin dár gcionn.
Dúirt Daniel Flynn, athair John, le Tuairisc, gur bheag nár thit sé i laige nuair a tugadh a mhac don Phápa lena bheannacht a fháil.
“Bhí iontas ar dhaoine gur éirigh leis an bPápa an bheannacht a thabhairt ar an mbalcóin, ach baineadh creathadh asainn go léir sa slua nuair a chualamar go raibh sé chun teacht amach go dtí an Chearnóg.
“D’éirigh linn dul síos chomh fada leis na ráillí, stop sé go tobann [carr an phápa]. Bhí John s’againne ag mo bhean agus tháinig duine de na fir shlándála anall agus thóg sé é agus thug sé don Phápa é. Ba bheag nár thit mé i laige. Ní fhéadfaimis é a chreidiúint. Ba é an leanbh beag deireanach a bheannaigh an Pápa. Cé a chreidfeadh é?”
Le seans a bhí muintir Flynn sa Róimh in aon chor. Bhí óstán curtha in áirithe acu don deireadh seachtaine seo caite i San Giovanni Rotondo, mar bhfuil Naomh Padre Pio curtha.
“Bhíomar meáite ar dhul go dtí Padre Pio agus bhí gach rud eagraithe agus an t-óstán curtha in áirithe againn don Satharn agus don Domhnach, agus ansin maidin Dé Sathairn, dúramar ‘rachaimid go dtí an Róimh, feicfimid Padre Pio arís’.
“Cén chúis a bhí againn ár n-intinn a athrú? Ní fhéadfainn é sin a mhíniú duit.”
Ina n-óstán sa Róimh a bhí Daniel agus a chlann nuair a chuala sé scéal bhás an Phápa maidin Dé Luain.
“Baineadh siar asam. Ní fhéadfainn é a chreidiúint. Chuaigh mé ar ais go dtí an áit chéanna sa Chearnóg agus leag mé bláthanna ann don Phápa.
“Bhí comhrá agam ann le bean as an nGearmáin agus le sagart a casadh orm agus d’inis mé an scéal dóibh faoi John, an páistín deireanach a fuair beannacht an phápa. Labhraíomar faoi cé chomh stairiúil is a bhí sé.”
De réir tuairisc sa Vatican News bhí an Pápa “tuirseach ach sásta” i ndiaidh bualadh leis an bpobal den uair dheireanach Domhnach Cásca.
“Go raibh maith agat as mé a thabhairt ar ais go dtí an Chearnóg,” a dúirt sé lena chúramóir sláinte, Massimiliano Strappetti.
De réir na tuairisce, theastaigh ón bPápa dul i measc an phobail ach bhí ábhairín amhrais air an ligfeadh a shláinte dó an chamchuairt timpeall na cearnóige a dhéanamh.
Strappetti a chuir ar a shuaimhneas é go n-éireodh leis an turas a dhéanamh sa popemobile i ndiaidh beannacht Urbi et Orbi na Cásca a thabhairt ó Bhalcóin Bhaisleac Naomh Peadar.
Fág freagra ar 'Éireannach an páistín deireanach a bheannaigh an Pápa Proinsias'