Nuachtán clóite Gaeilge nua seolta ag Oireachtas na Samhna 

Dúirt eagarthóir an nuachtáin úr Gaeilge, Caoimhín Ó Cadhla, go raibh sceitimíní air an nuachtán nua, An Páipéar, a chur os comhair an phobail agus an nuachtán clóite seolta ag Oireachtas na Samhna.  

“Ardán a chothóidh scríobh na Gaeilge agus dioscúrsa i measc phobal na Gaeilge” a bheidh sa nuachtán dar leis an iriseoir Eoghan Ó Néill agus é á sheoladh tráthnóna Dé hAoine. Dúirt sé gur “údar mór dóchais” a bhíonn ann “aon uair a sheoltar nuachtán nua”. 

Nochtadh teideal an nuachtáin – An Páipéar – a bhí á choinneáil faoi rún ag Gaelmheáin ó fógraíodh cúpla seachtain ó shin go raibh sé i gceist ag an gcomhlacht “an chéad nuachtán clóite Gaeilge ó cuireadh deireadh le Gaelscéal” a fhoilsiú ar bhonn seachtainiúil gach Aoine ón 1 Samhain.  

Dúirt Caoimhín Ó Cadhla go raibh sé “ag súil go n-éireodh leis” an bhfiontar nua ach “neirbhíseach faoi ag an am céanna”. 

“Bhraith mé gur bhain sé de stádas na Gaeilge nach raibh nuachtán clóite sa teanga sin ar fáil. Ba é sin a spreag mé tabhairt faoin togra seo agus chuir mé tús leis an obair i mí Feabhra. Tá sceitimíní orm a bheith anseo ag an Oireachtas inniu agus an nuachtán á sheoladh agam. Ciallaíonn an focal sin ‘sceitimíní’ go bhfuil tú ag súil le rud agus neirbhíseach faoi ag an am céanna, agus is mar sin a bhraithim anois,” a dúirt Ó Cadhla.  

Dúirt Ó Cadhla go raibh sé thar a bheith “speisialta” gur scríobh an tUachtarán Micheál D Ó hUigínn an chéad alt sa nuachtán, alt fáilte atá ar an bpríomhleathanach.  

“Tá sé speisialta gurb é an tUachtarán, fear a bhí ina Aire Gaeltachta nuair a seoladh TnaG i 1996 agus fear a thacaigh leis na meáin Ghaeilge i gcónaí, a scríobh an chéad alt sin agus atá tar éis fáilte mhór a chur roimh An Páipéar,” a dúirt sé.  

Ar an gcéad leathanach sin tá an teachtaireacht fáilte ón Uachtarán chomh maith le heolas faoi sheoladh an nuachtáin ag Oireachtas na Samhna. Laistigh tá rannóga nuachta náisiúnta agus idirnáisiúnta, tuairimíocht, ‘comhfhreagras’ (litreacha ó na léitheoirí), eagarfhocal, clár imeachtaí Gaeilge, léirmheasanna ar leabhar agus féile, rannóg oideachais, alt faoin mbéaloideas, sceidil teilifíse agus raidió, puzail, agus tuairiscí spóirt.  

Dúirt an tUachtarán Ó hUigínn go gcuirfidh an nuachtán nua “ardán geal seasmhach faoi bhláth ar fáil do thodhchaí na Gaeilge” agus é ag tréaslú le lucht a fhoilsithe.  

“Tá súil agam go scaipfidh an nuachtán seo eolas, ach go dtabharfaidh sé inspioráid freisin, cabhróidh sé linn ár dteanga a choimeád beo agus tabharfaidh sé misneach do dhaoine níos mó Gaeilge a úsáid ina saolta laethúla,” a scríobh sé.  

Tá an nuachtán sé leathanach déag ar díol in 300 siopa “ar fud na tíre” ar €3 nó £2.50 sa Tuaisceart. Leagan amach táblóideach atá ar An Páipéar agus é lándaite.  

Ina chéad eagarfhocal sa nuachtán dúirt Caoimhín Ó Cadhla gurb é “aidhm Ghaelmheáin Teoranta go mbeidh an nuachtán ar fáil i ngach siopa sa tír”.  

“Ba chóir go gcuideodh an nuachtán seo léitheoireacht na Gaeilge a normalú. Ba mhaith liom go mbeidh ionchur ag an bpobal ar an nuachtán seo trí litreacha a scríobh, imeachtaí Gaeilge a phoibliú agus fógraí éagsúla a chur isteach ann. Is linne pobal na Gaeilge an nuachtán seo agus tá súil agam go mbainfidh sibh sult as an nuachtán is as na scéalta is déanaí a fháil,” a dúirt sé.  

Dúirt Ó Cadhla go bhfuil súil ag Gaelmheáin cur le líon na leathanach a bheidh sa nuachtán amach anseo agus go raibh súil aige go mbeadh níos mó scríbhneoirí ag soláthar ailt don fhoilseachán sna seachtainí amach romhainn.  

“Ba mhaith linn go mbeadh níos mó leathanach san eagrán clóite, ba mhaith linn go mbeadh aip ann, agus ba mhaith linn forbairt a dhéanamh ar an suíomh idirlín. 

“Chomh maith leis sin ba mhaith linn cur le líon na scríbhneoirí agus leis na cineálacha daoine a bhíonn ag scríobh don pháipéar. Ba mhaith linn níos mó ban a thabhairt isteach agus níos mó daoine ó phobail éagsúla le go mbeadh léargas an-leathan ar an saol ar fáil ar na leathanaigh,” a dúirt sé.  

Is fir den chuid is mó a scríobh don chéad eagrán de An Páipéar agus gan ach aon alt amháin ann ó pheann mná – an léirmheas ar an leabhar Stair na Síochána a scríobh Máire Úna Ní Bheaglaoich.  

Tá síntiúis éagsúla ar fáil do An Páipéar: €128(£107)/bliain don eagrán clóite; €10.63(£8.86)/mí don eagrán clóite; €68(£57)/bliain don eagrán digiteach; €5.70(£4.75)/mí don eagrán digiteach; €170(£142)/bliain don eagrán clóite agus digiteach, €14.45(£12.04)/mí don eagrán clóite agus digiteach.