Ní raibh an ceart acu siúd a dúirt go raibh páirtí de Valera scriosta, ach níl cuma na maitheasa orthu

Tá sé beagán os cionn aon bhliain déag go leith ó shin ó tharla titim thubaisteach ar thacaíocht Fhianna Fáil san olltoghchán in 2011. Chaill siad os cionn 24% dá gcuid tacaíochta nuair a chuir an pobal milleán orthu as an tubaiste eacnamaíochta a bhain don tír.

I mí Eanáir na bliana céanna a toghadh Micheál Martin ina cheannaire ar an bpáirtí. Tar éis an olltoghcháin an bhliain sin bhí sé á thuar go fairsing go raibh an páirtí réidh agus nach raibh tada i ndán dóibh. Caolseans go mbeadh Micheál Martin ina Thaoiseach go brách.

Ní raibh an ceart acu siúd a bhí ag tuar go raibh páirtí de Valera scriosta. Ní raibh an ceart acu a rá nach mbeadh Micheál Martin ina Thaoiseach. Tá sé in oifig an Taoisigh ó mhí an Mheithimh 2020 a bhuíochas do chomhrialtas leis na sean-naimhde Fine Gael.

Nuair a thiocfaidh toscairí Fhianna Fáil le chéile tráthnóna don chéad Ard-Fheis le roinnt blianta beidh sé le maíomh acu go bhfuil siad i rialtas, gur Fianna Fáileach é an Taoiseach agus go bhfuil siad ar an bpáirtí is mó sa Dáil.

Údar gaisce agus ceiliúrtha, mar sin?

Bhuel, sin í an cheist. De réir na dtuairiscí tá sé ag dul rite leo toscairí a mhealladh le freastal ar an Ard-Fheis. Ba ghnách le cúpla míle duine freastal ar Ard-Fheis Fhianna Fáil lá den saol. Níl an míle féin cláraithe i mbliana. Tá an páirtí níos lú ná mar a bhíodh, cinnte, agus b’fhéidir gur comhartha sóirt a laghad suime agus atá san Ard-Fheis den easpa suime sa bpolaitíocht trí chéile. B’fhéidir, freisin, gur comhartha sóirt é do pháirtí atá ar strae agus nach bhfuil ag éirí leis na daoine a vótáil dóibh ar feadh an chuid is mó den chéad seo caite a mhealladh ar ais. Nó dul i gcion ar a gclann nó a ngarchlann?

Tá cúlbhinseoirí sa bpáirtí imníoch nach bhfuil aon tionchar acu ar an gcomhrá polaitiúil faoi láthair. Is iad Fine Gael agus Sinn Féin na páirtithe a bhfuil aird an phobail orthu. Tá na daoine óga a bhíodh ag tacú le Fianna Fáil lá den saol mar gheall ar an teanga agus stádas bunreachtúil na tíre ag druidim i dtreo Shinn Féin. Tá na feirmeoirí láidre agus fostóirí beaga a bhíodh ag tacú le Fianna Fáil mar gheall ar a n-oidhreacht ag tacú go dílis le Fine Gael le na déaga de bhlianta anois.

Tá milleán ag go leor ar Mhicheál Martin agus a cheannaireacht ar an bpáirtí. Tá sé róthugtha don chomhghéilleadh, a déarfadh cuid de sheanfhondúirí an pháirtí. An gcuirfidh siad an míshásamh sin in iúl an deireadh seachtaine seo le linn na hArd-Fheise? Nó an leanfaidh siad leo go socair ó tharla iad ag bord an rialtais agus oifig an Taoisigh ina seilbh más go gearrthéarmach féin é?