Agus iad ag éirí aníos ba nós le gasúir an tí seo agus gasúir an bhaile fré chéile ceann d’fhoirne sacair Shasana a tharraingt chucu féin lena dtacaíocht a thabhairt di. Is ionann cás i gcónaí sna ceithre hairde.
Níos minice ná a chéile roghnaíonn cuid acu an cumann is ansa lena n-athair nó le duine níos sine ná iad sa teach. Léiríonn tuilleadh fós beagán d’fhéith an neamhspleáchais agus seasann siad ar a gcosa féin. Ach mórán i gcónaí is ceann as príomhroinn Shasana a bhíodh agus a bhíonn i gceist – Man Utd, Chelsea, Arsenal, Liverpool, Man City agus a leithéid.
Bíonn corr éan cuaiche ann. Tá bean i mo dhúiche a thacaíonn le Aston Villa, fear ar minic leis a theacht isteach i dteach an óil agus geansaí West Bromwich Albion air agus ar ndóigh i saol ilnáisiúnta, ilchultúrtha an lae inniu geansaithe Barcelona, AC Milan agus a leithéidí le feiceáil minic go leor freisin.
Bhíodh an-suim ag gasúir an bhaile sin againne a fháil amach ó chuile dhuine cén club ag a raibh a ndílseacht agus ba é an chúis ba mhó a bhí leis go mbeadh deis fonóide acu uair ar bith a bhfaigheadh a bhfoireann féin an ceann ab fhearr ar rogha an duine eile.
Níl rud is mó a shantaíonn an duine óg ná bob a bhualadh ar an té is sine ná é.
Bhí comharsa liom a raibh lán an tí de Liverpools, Uniteds agus Chelseas aige agus iad síoraí in árach a chéile timpeall an bhoird agus na teilifíse. Chaith siadsan agus muintir mo thí-se tamallacha móra ag impí ar mo dhuine foireann éicint a roghnú, ach ba mhó spéis a bhí ag Ian Paisley san Aifreann ná a bhí ag mo chara i gcluiche an tsacair.
Mar sin féin, faoi dheireadh le grá don réiteach, ní raibh aige ach géilleadh agus tráthnóna Sathairn amháin agus cur agus cúiteamh á dhéanamh faoi chluichí an lae sin gheall sé go mbeadh foireann roghnaithe aige faoin am a dtiocfadh babhta imeartha an deireadh seachtaine dár gcionn.
Ní bhíonn a oiread tnútháin leis an deatach a thagann as simléar an tSéipéil Shistínigh agus Pápa nua á thoghadh agus a bhí le toradh a chríonnachta agus nuair a tháinig an lá bhí ochtar nó naonúr bailithe timpeall an bhoird go gcloisfeadh siad focal an tsaoi.
Níor fhág sé smid acu nuair a d’fhógair sé a chinneadh… ‘Barnsley’!
Anois is é a raibh d’eolas aige faoi Barnsley go mba ann a rugadh Mick McCarthy a bhí ina bhainisteoir ar fhoireann sacair na hÉireann ag an am. Ní raibh sé in ann a insint cén roinn inar imir siad, ní áirím ainm a chur ar dhuine dá n-imreoirí, ach bhí a dhualgas comhlíonta aige.
Caitheadh seachtain ag fonóid faoi agus ina dhiaidh sin níor cuireadh isteach nó amach air.
Is liomsa anois a fhógairt go bhfuil ‘Barnsley’ de mo chuid féin roghnaithe agam do chomórtas Chraobh Sacair an Domhain atá tosaithe sa Rúis.
Sin iad Panama.
Dá gceisteofá mé inné faoi iad a bheith san iomaíocht nó gan a bheith, ní bheinn in ann tú a fhreagairt – ach tá, sa ngrúpa céanna leis an mBeilg, leis an Túinéis agus le Sasana.
Sa mbeagán taighde atá déanta lena chois sin agam feicim go bhfaighfeá 500/1 ón ngeallghlacadóir gur acu a bheas Trófaí Coirn an Domhain ar fhilleadh abhaile dóibh. Ní iontas sin nuair a fheiceann tú gur bhuaigh an Eilvéis 6-0 orthu i gcluiche dúshláin dhá mhí ó shin agus go bhfuil 100/1 le fáil orthu siúd ón ngeallghlacadóir céanna.
Sna Státaí a imríonn seisear den 23 imreoir a bheas ag seasamh an fhóid do Panama sa Rúis, ina measc Román Torres (Seattle Sounders) a scóráil an cúl in aghaidh Chósta Ríce a d’fhág a thír i mbabhtaí ceannais Chorn an Domhain den chéad uair riamh.
Ní imríonn ach triúr acu ina dtír dhúchais – imreoir lár páirce darbh ainm Amador agus an bheirt cúl báire ionaid.
Imreoirí páirtaimseartha atá san iomaíocht i sraith sin Panama féin, tír ina saothraíonn oibrí oifige tuairim is $70 in aghaidh na míosa agus cuntasóir $500.
Is beag an t-iontas mar sin gur bhuail Torres bóthar, ach tá éagsúlacht mhór idir an pá a thuilleann na himreoirí is cáiliúla sna Státaí agus iad siúd atá ar an mbunráta. Tuairiscítear gur shaothraigh David Beckham $250 milliún sna cúig bliana a chaith sé i Los Angeles, ach tá 40 imreoir san MLS nár shaothraigh anuraidh ach an bunphá $50,000 sa mbliain. Tharlódh ár gcara Román a bheith ar dhuine acu.
Go fiú más fíor sin, tá a dhá oiread á shaothrú aige agus a bheadh sa mbaile dá mba chuntasóir nó innealtóir é.
Tá an chuid eile d’fhoireann Panama scaipthe ar thíortha eile i Meiriceá Láir agus Theas – Hondúras, Guatamala, an Cholóim, Meicsiceo, an tSile, Cósta Ríce agus Peiriú.
Tá beirt acu ag imirt sa mBeilg, duine sa tSlóvaic agus duine eile fós sa Spáinn, áit a n-imríonn sé le Deportivo Fabril, foireann cúltaca Deportivo La Coruna.
Hernán Darío Gómez atá ar a mbainisteoir – ní féidir ach gur fear cumasach é duine a bhfuil trí ‘shíneadh fada’ ina ainm.
Seo an tríú tír tugtha chomh fada le babhtaí ceannais Chorn an Domhain aige. Rinne sé cheana é leis an gColóim (1998) agus le Eacuadór (2002).
‘Hala Panama’ – (agus Barnsley)!
– Imreoidh Panama in aghaidh na Beilge i nGrúpa G ag 6pm amárach, Dé Luain
Concubhar
Is beag is fiú corrluachanna Paddy Power chun fiúntas fóirne a chur i gcodarsnacht le chéile nuair is féidir leis an Íoslainn 400/1 comhscór a bhaint amach leis an Airgintín 11/1 agus An Bhrasail 4/1 comhscór leis an Eilbhéis 100/1